මේ අනුව නායකත්වය විසින් නියෝජ්‍ය නායක ධුරයට සජිත් ප්‍රේමදාස මහතාව ද උප නායක ධුරයට රවි කරුණානායක මහතාව ද යෝජනා කර ඇති නමුත් එම තනතුරු දෙක අතර ඇති වෙනස හෝ එයින් ඉහළ පහළ තිබෙන්නේ කුමන ධුරය ද යන්න පැහැදිලි කිරීමක් කර නොතිබීම හේතුවෙන් මෙම අර්බුදය පැන නැගී ඇතැයි ද හෙතෙම පැවසීය.
එයට අමතරව දැනට ක්‍රියාත්මක වන නායකත්ව මණ්ඩලය මෙම තනතුරු දෙකත් සමඟ ස්ථානගත වන්නේ කොතැනක දැයි පැහැදිලි කිරීමක් ද නැති බැවින් මෙම අර්බුදය තවත් උත්සන්න වී ඇතැයි එම ප්‍රකාශකයා සඳහන් කළේ ය.
එසේම නියෝජ්‍ය නායකත්වය ලබා ගැනීම සඳහා සජිත් ප්‍රේමදාස මහතා ඉදිරිපත් කළ කොන්දේසිවලට සිදුවූ දෙය තවමත් පැහැදිලි නැති අතර, තමා නියෝජ්‍ය නායකත්වයට පත් වන්නේ නම් නායකත්ව මණ්ඩලය අහෝසි කළ යුතු යැයි ද එජාප සාමාජිකත්වයෙන් ඉවත් කර ඇති සමහර සාමාජිකයන් කොන්දේසි විරහිතව නැවත වරක් පක්ෂයට බඳවා ගත යුතුව ඇතැයි සඳහන් කොන්දේසිවලට කුමක් සිදුවූයේ දැයි දැනගැනීමට නැති බව ද හෙතෙම සඳහන් කළේය.
ඒ අනුව වසරක කාලසීමාවක් සඳහා පත් කරනු ලැබූ එක්සත් ජාතික පක්ෂයේ නායකත්ව මණ්ඩලය නොවැම්බර් මාසයේදී නිල කාලසීමාව අවසන් වන බැවින් එය දිගු කිරීමකට නොයාම ඉබේම අහෝසි වන පරිදි ක්‍රියා කිරීමට එක්සත් ජාතික පක්ෂයේ කෘත්‍යාධිකාරී මණ්ඩලය කටයුතු කිරීම ද පක්ෂය තුළ අර්බුදයක් මතු කිරීමට හේතුවී ඇතැයි ද හෙතෙම සඳහන් කළේය.
ඒ අනුව නායකත්ව මණ්ඩලයේ සභාපති කරු ජයසූරිය මහතා ඇතුළු සාමාජික පිරිසව අත්හැර ජනාධිපතිවරණය සඳහා මෙහෙයුම් කමිටුවක් පත් කිරීමට එක්සත් ජාතික පක්ෂයේ ජාතික නායක රනිල් වික්‍රමසිංහ මහතා ඇතුළු 19 දෙනකු පත් කිරීමට පියවර ගෙන ඇතැයි ඔහු වැඩිදුරටත් පෙන්වා දුන්නේ ය.
