මන්ත්‍රීවරුන්ගේ විශේෂ ප්‍රකාශ යටතේ මන්ත්‍රීවරුන් කිහිපදෙනෙකු අදහස්‌ ප්‍රකාශ කිරීමෙන් පසු අදහස්‌ දැක්‌වීමේ අවස්‌ථාව එජනිස මන්ත්‍රී ඉසුරු දේවප්‍රිය මහතාට හිමිවිය.

එහිදී මන්ත්‍රීවරයා අදහස්‌ දක්‌වමින් සිටියදී ඌව පළාත් සභා මැතිවරණයෙන් ප්‍රජාතන්ත්‍රවාදී පක්‌ෂය ලැබූ අන්ත පරාජය ගැන සිහිපත් කරමින් හිටපු හමුදාපතිවරයාගේ ජීවිතය බේරුණේ ඔහුට ආරක්‌ෂාව සැපයූ නිලධාරියකු බෝම්බය ඇඟේ බැඳගෙන පැමිණි කොටි කාන්තාවට පහරදීම නිසා බවද කීය.

මන්ත්‍රීවරයා එහිදී වැඩිදුරටත් කියා සිටියේ ආරක්‌ෂක නිලධාරියා නොසිටින්නට සුරූපී කාන්තාව සරත් ෆොන්සේකා මහතා බදා ගැනීමට ඉඩ තිබූ බවයි.

එම ප්‍රකාශයත් සමග විපක්‌ෂයේ ප්‍රජාතන්ත්‍රවාදී පක්‌ෂයේ ප්‍රදීප් උඩවෙල, සුසිල් කිදෙල්පිටිය, අරුණ දීපාල් යන මහත්වරුන් ඇතුළු එම පක්‌ෂයේ මන්ත්‍රී පස්‌දෙනා එම ප්‍රකාශය ඉල්ලා අස්‌කර ගන්නා ලෙස දැඩි විරෝධය පළ කරමින් සභාවෙන් නික්‌ම යැමට තැත් කළහ.

එහිදී සභාව පාලනය කර ගැනීම සඳහා නියෝජ්‍ය සභාපති යසපාල කෝරළගේ මහතා සභාව විනාඩි පහකට කල්තබනු ලැබීය. එම අවස්‌ථාවේදී ආණ්‌ඩු පක්‌ෂයේ මන්ත්‍රී රොජර් සෙනවිරත්න සහ ප්‍රජාතන්ත්‍රවාදී පක්‌ෂයේ මන්ත්‍රී ප්‍රදීප් උඩවෙල යන මහත්වරුන් පුටු දෙකකට වී සුහදව බුලත්විටක්‌ බෙදා හදාගෙන කන අයුරු මාධ්‍යවේදීන්ට දැකගත හැකි විය