මෝටර් රථ ප්‍රවාහන දෙපාර්තමේන්තුව සහ මාකුඹුර බහුවිධ ප්‍රවාහන මධ්‍යස්ථානය එක්ව මෙම වැඩපිළිවෙළ ආරම්භ කර තිබෙන බවද නියමු ව්‍යාපෘතියක් වශයෙන් අද සිට මෙම පරීක්ෂාවන් සිදුකරන බවද මෝටර් රථ ප්‍රවාහන දෙපාර්තමේන්තුවේ සහකාර කොමසාරිස් (කාර්මික) අරුණ බතීගම පැවසීය.
ගැරඬිඇල්ල හා ඇල්ල බස් අනතුරුවලින් පසුව මගී ප්‍රවාහන බස් රථ සම්බන්ධයෙන් නිර්දේශ හා නියෝග මාලාවක් යෝජනා වූ අතර එහි ප්‍රධානම යෝජනාවක් වූයේ දුර ගමන් සේවා බස් රථ ධාවනයට පෙර එහි යාන්ත්‍රික තත්ත්වයන් පිළිබඳ පරීක්ෂාකර සහතිකයක් ලබාගැනීම අත්‍යවශ්‍ය බවයි.මාකුඹුර බහුවිධ ප්‍රවාහන මධ්‍යස්ථානයේ සිට ගමනාන්ත 09ක් සඳහා දෛනිකව බස් ගමන්වාර 135ක් ක්‍රියාත්මක වන බවත් මෙම බස් රථ ධාවනයට පෙර පරීක්ෂා කිරීමට සැලසුම් කර සිටින බවත් එම මධ්‍යස්ථානයේ උසස් නිලධාරියෙක් සඳහන් කළේය.
මෙම වැඩසටහන ප්‍රවාහන නියෝජ්‍ය ඇමැති ප්‍රසන්න ගුණසේන, මෝටර් රථ ප්‍රවාහන කොමසාරිස් ජනරාල් කමල් අමරසිංහ සහ මාකුඹුර බහුවිධ ප්‍රවාහන මධ්‍යස්ථානයේ අධ්‍යක්ෂ නාලක දිසානායක ඇතුළු නිලධාරීන්ගෙන් ප්‍රධානත්වයෙන් අද (10 වැනිදා) උදෑසන ආරම්භ කෙරේ.
