මෙම වසරේ අගෝස්තු 31 වැනිදා වන විට බදු පෙර ලාභය රුපියල් මිලියන 539.93ක් වන අතර, එය පෙර වසරේ එම කාලය තුළ පැවැති රුපියල් මිලියන 194.43ක ලාභයට සාපේක්ෂව සියයට 192ක වර්ධනයක් පෙන්නුම් කරයි.
2024 ඔක්තෝබර් 7 වැනිදා සිදු වූ අවාසනාවන්ත සිදුවීමෙන් පසු, නෙළුම් කුලුනේ ආරක්ෂක ප්‍රමිතීන් ඉහළ නැංවීමට පියවර ගෙන තිබේ. මේ යටතේ නැරඹුම් මණ්ඩපයේ ආරක්ෂාව සඳහා යකඩ ආවරණයක් යොදා ඇති අතර, ආරක්ෂක නිලධාරීන් සහ CCTV නිරීක්ෂණ වැඩි කර ඇත.
තවදුරටත්, සේවාවන්හි කාර්යක්ෂමතාව වැඩි කිරීම සඳහා ඩිජිටල්කරණ වැඩසටහන් ක්‍රියාත්මක වෙමින් පවතී. නුදුරේදීම හඳුන්වා දීමට නියමිත ඔන්ලයින් ටිකට්පත් මිලදී ගැනීමේ ක්‍රමවේදය මගින් නෙළුම් කුලුන නැරඹීමට පැමිණෙන ජනතාවගේ තදබදය අවම කරගත හැකි බව සභාපතිවරයා සඳහන් කළේය.
මීට අමතරව, ඩිජිටල් කාර් නැවැත්වීමේ පහසුකම් සහ වඩාත් විධිමත් වෙබ් අඩවියක් ද ඉදිරියේදී හඳුන්වා දීමට සැලසුම් කර ඇත.
නෙළුම් කුලුනේ ආදායම ඉහළ නැංවීම සඳහා නව ව්‍යාපෘති කිහිපයක් ක්‍රියාත්මක කිරීමට නියමිතය. ඒ අතර, "Lotus Aquarium Café" නමින් අවන්හලක්, "බංගි ජම්පින්" වැනි ත්‍රාසජනක ක්‍රීඩා මධ්‍යස්ථානයක් සහ 28 වන මහලේ සුඛෝපභෝගී නවාතැන් පහසුකම් සංවර්ධනය කිරීමට සැලසුම් කර ඇත. වර්ග අඩි 42,000ක ගබඩා ව්‍යාපෘතියක් මගින්ද ආදායම් උත්පාදනය කිරීමට අපේක්ෂා කෙරේ.
සභාපතිවරයා වැඩිදුරටත් කියා සිටියේ, මෙම ව්‍යාපෘතිය සඳහා වැය වූ මහජන මුදල් නැවත ජනතාවට උපයා දීම තම අරමුණ බවයි. ඔහු අවධාරණය කළේ, කුලුනේ සෑම බිම් අඟලක්ම වෙළෙඳ වටිනාකමකින් යුතුව ආදායම් උත්පාදනය සඳහා යොදවන බවයි. තමා මේ සඳහා වැටුප් නොගෙන සේවයක් ලෙස කටයුතු කරන බවද ඔහු සඳහන් කළේය.
සමාගමේ ප්‍රධාන විධායක නිලධාරී, ජ්‍යෙෂ්ඨ මහාචාර්ය චමරු ද අල්විස් පැවැසුවේ, නෙළුම් කුලුනේ වාර්ෂික ආදායම රුපියල් මිලියන දාහක් දක්වා ඉහළ නැංවීම අපේක්ෂාව බවයි. සේවකයන්ගේ උනන්දුව සහ කැපවීම මෙම ප්‍රගතියට ප්‍රධාන හේතුවක් වූ බවද ඔහු සඳහන් කළේය.
