ඔවුන් පෙන්වා දෙන්නේ සැප්තැම්බර් 24 වැනිදා තෙක් ලංකා විදුලිබල මණ්ඩලයේ වෘත්තිය සමිති ආරම්භ කර ඇති අකුරට වැඩ කිරීමේ වෘත්තිය ක්‍රියාමාර්ගය අඛණ්ඩව ගෙනියන බවය.
මෙම අකුරට වැඩ කිරීමේ වෘත්තිය සමිති ව්‍යාපාරය ආරම්භ වූයේ සැප්තැම්බර් 05 වැනිදා වන අතර මේ වන විට එයට සති දෙකක කාලයක් ගතව ඇත.
ඊයේ (22) මාධ්‍ය හමුවේ අදහස් දක්වමින් ලංකා විදුලිබල මණ්ඩලයේ නිදහස් සේවක සංගමයේ ප්‍රධාන ලේකම් ප්‍රභාත් ප්‍රියන්ත පැවසුවේ බදාදා දිනට ගන්නා තීරණය බොහෝ දුරට වැඩ වර්ජනයක් විය හැකි බවය.
කෙසේ වෙතත් ඔහු පවසා සිටින්නේ සේවකයන්ගේ ඉල්ලීම්වලට මේ වනතෙක් බලධාරීන් විසඳුමක් ලබාදී නොමැති බවය.
මේ සම්බන්ධයෙන් වැඩිදුරටත් අදහස් දක්වමින් හෙතම මෙසේද පැවසුවේය.
" විසි හතරවැනිදා දහවල් නැවතත් වෘත්තිය සමිති විසිපහම රැස්වෙනවා. අපි ඊයේ තමා තීරණය කළේ විසි හතර වෙනකන් ඉමු කියන එක. මේ දින දෙකෙහි යහපත් සාකච්ඡාවක් නැත්නම් අපි අනිවාර්යයෙන්ම අන්තිම අදියරය වන වැඩවර්ජන තීන්දුව බදාදාට ගැනීමට බලාපොරොත්තු වෙනවා. එක් දිනක වැඩවර්ජනයක්ද, සංඛේත වැඩවර්ජනයක්ද, අඛණ්ඩ වැඩවර්ජනයක්ද කියන එක අපි පැහැදිලිව බදාදා දින ප්‍රකාශය කරනවා. "
