අනතුරෙන් මිය ගොස් තිබුනේ එම ප්‍රදේශයේම පදිංචි 12 හැවිරිදි රිෂිනි නෙතුපමා කුලරත්න සහ 13 හැවිරිදි මිහිදි සෙනායා නිල්නෙතු නැමති සිසුවියයි.

අනතුරින් ජීවිතක්ෂයට පත්වූ 67 හැවිරිදි පාසැල් වෑන් රථ රියදුරු ද එම ප්‍රදේශයේම පදිංචි පුද්ගලයෙක්.

එමෙන්ම අදාල අනතුර සම්බන්ධයෙන් අත්අඩංගුවට ගත් ටිපර් රථ රියදුරා ලබන මස 8 වනදා දක්වා රක්ෂිත බන්ධනාගාරගත කෙරුණා.

ඒ කුලියාපිටිය මහේස්ත්‍රාත් රන්දික ලක්මාල් ජයලත්ගේ නියෝගයකට අනුවයි.

මෙලෙස රක්ෂිත බන්ධනාගාරගත කෙරුණේ මාරවිල මූදූකටුව ප්‍රදේශයේ පදිංචි අවුරුදු 23ක පුද්ගලයෙක්.

පොලිසිය අධිකරණය හමුවේ කියා සිටියේ, සැකකරු පැය 24ක් නොනිදා සේවය කර ඇති බව අනාවරණය වී ඇති බවයි.

එසේම, මියගිය වෑන් රථයේ රියදුරු අනතුර වලක්වාගැනීමට දැඩි උත්සහයක් ගෙන තිබූ බවද පොලිසිය ප්‍රකාශ කළා.

මේ අතර, අනුරාධපුර හොරොව්පතාන - කහටගස්දිගිලිය ප්‍රධාන මාර්ගයේ, ඇලයාපත්තුව ප්‍රදේශයේදී ඊයේ පස්වරුවේ සිදුවූ ලොරි රථ අනතුරකින් 10 හැවිරිදි දැරියක් සහ 27 හැවිරිදි පුද්ගලයෙකු ජීවිතක්ෂයට පත් වුණා.

වීදුරු ප්‍රවාහනය කරමින් තිබූ ලොරි රථය මාර්ගයෙන් ඉවතට පැන පාලමක ආරක්ෂිත වැටෙහි ගැටී මෙම අනතුර සිදුව තිබූ අතර පොලිසිය සැක කරන්නේ රියැදුරුට නින්ද යාම හේතුවෙන් මෙම අනතුර සිදුව ඇති බවයි.

මියගිය දැරිය පාසල අවසන්වී නිවස බලා යමින් සිටියදී මෙම අනතුරට මුහුණ පා තිබූ අතර ඇය මොරකෑව විද්‍යාලයේ 5 වන ශ්‍රේණියේ ඉගෙනුම ලබමින් සිටි දැරියක් වනවා.

අනතුර සිදුවන අවස්ථාවේ ලොරි රථයේ තිදෙනෙකු සිට ඇති අතර රියැදුරු හා අනෙක් පුද්ගලයා බරපතල තුවාල ලබා හොරොව්පතාන රෝහලට ඇතුලත් කිරීමෙන් අනතුරුව වැඩිදුර ප්‍රතිකාර සඳහා මාරුකර යැවුණේ, අනුරාධපුර රෝහලටයි.