හිටපු බස්නායක නිලමේවරයා වන මිගාර ජයසුන්දර මහතා ප්‍රමුඛ රාජකාරි මණ්ඩලයේ කිහිප දෙනෙකු විසින් කොළඹ අභියාචනා අධිකරණයේ ගොනු කරන ලද නඩුවක් පෙරේදා සලකා බැලූ අභියාචනා අධිකරණය එම වැඩ බලන බස්නායක නිලමේවරයා එම තනතුරින් ඉවත් කිරීමට තීන්දුවක් ලබා දී තිබිණි.
බෞද්ධ කටයුතු කොමසාරිස්වරයා විසින් සබරගමුව මහ සමන් දේවාලයේ තාවකාලික භාරකරු ලෙස මැණික් ව්‍යාපාරික එස්.වී. චන්ද්‍රසිංහ මහතා පත් කිරීම සිදු කර තිබිණි.
එමෙන්ම ලබන 11 වැනිදා පැවැත්වීමට නියමිත එම දේවාලයේ බස්නායක නිලමේවරයා තෝරා ගැනීමට අදාළ නිලවරණයේ දී ඒ මහතාට ඡන්දය ප්‍රකාශ කිරීම වළක්වාලමින් අභියාචනාධිකරණය විසින් තවත් අතුරු තහනම් නියෝගයක් ද නිකුත් කරනු ලැබීය.
හිටපු බස්නායක නිලමේගේ ධූර කාලය අවසන් වූ පසු වර්තමාන වැඩ බලන බස්නායක නිලමේවරයා පත්කර ඇත්තේ සම්ප්‍රදාය කඩකරමින් හා අනීතිකව බව පවසමින් මෙම පත් කිරීම අත්හිටුවන්නැයි ඉල්ලමින් ගොනු කර තිබූ පෙත්සමක් සලකා බලමින් මෙම නියෝග නිකුත් කලේය.
මෙම පත් කිරීමට විරෝධය පල කරමින් පසුගියදා සමන් දේවාලය ඉදිරියේ විරෝධතාවක් පැවති අතර ඔවුන් පැවසුවේ වැඩබලන බස්නායක නිලමෙවරයා ලෙස පත් කර ඇත්තේ ආණ්ඩුවේ දේශපාලන ක‍්‍රියාකාරිකයෙකු බවයි.
