පාරිභෝගික ජනතාවද කියා සිටින්නේ සිල්ලර හා තොග වෙළෙඳසල්වල කැකුළු සහල් අලෙවි කිරීමට නොමැති බවය. කුඩා පරිමාණ සහල් මෝල්වලද කැකුළු සහල් අලෙවි කිරීමට නොමැති බවත්, ආනයනික කැකුළු සහල් තොගවලට සිදුවන්නේ කුමක්දැයි රජය අවධානය යොමුකළ යුතු බවත් පාරිභෝගික ජනතාව කියා සිටිති.

එක්සත් සහල් නිෂ්පාදකයන්ගේ සංගමයේ සභාපති මුදිත් පෙරේරා කියා සිටියේ ආනයනික කැකුළු සහල් කිලෝවක් රුපියල් 210 ක තොග මිලට අලෙවි කිරීම පාඩු බැවින්, ආනයනකරුවන් රැසක් එම තොග වැඩි මිලට බියර් නිෂ්පාදනයට සහ සහල් පිටි නිෂ්පාදන කටයුතු සඳහා අලෙවි කරන බවය. මේ නිසා ආනයනික කැකුළු සහල් වෙළෙඳපොළට නොලැබෙන බව ද ඔහු කීවේය.

රජය පාරිභෝගික කටයුතු පිළිබඳ අධිකාරිය යොදවා මහා පරිමාණ සහල් නිෂ්පාදකයන්ගේ සහල් නිෂ්පාදනාගාර පරීක්ෂා කළ ද, මහා පරිමාණ සහල් නිෂ්පාදකයන් බොහෝ දෙනෙකු සතුව කැකුළු සහල් තොග නොමැති බවද ඔහු පැවැසීය.

කැකුළු සහල් වැඩිපුර නිෂ්පාදනය කරනු ලබන්නේ දකුණු පළාතේ සහ නැගෙනහිර පළාතේ සිටින සුළු හා මධ්‍ය පරිමාණ වී මෝල් හිමියන් බවත්, ඔවුන්ගේ සහල් තොග නියාමනයට ලක් නොවීම නිසා එම දේශීය කැකුළු සහල් තොග ද සහල් පිටි හා ඒ ආශ්‍රිත නිෂ්පාදන, සත්ත්ව ආහාර සඳහා කැඩුණු සහල් ලෙස වැඩි මිලට අලෙවි කරන බව ද සභාපතිවරයා පැවැසුවේය. රේගුව සඳහන් කරන්නේ ඉකුත් 04 වැනිදා සිට 27 වැනිදා දක්වා වූ කාලය තුළ දී ඉන්දියාවෙන් සහල් මෙට්‍රික් ටොන් 72,000 ක තොගයක් ආනයනය කර තිබෙන බවය. ඉන් මෙට්‍රික් ටොන් 32,000 ක් කැකුළු සහල් වන අතර, මෙට්‍රික් ටොන් 40,000 ක් නාඩු සහල් වේ.
ජනතාව කියා සිටින්නේ ලංකා සතොස ශාඛා ජාලය තුළ ද ප්‍රමාණවත් පරිදි සහල් අලෙවි කිරීමට නොමැති බවය.

රජය සහල් සඳහා පාලන මිලක් නියම කළ ද, එම මිල ගණන්වලට සහල් අලෙවි නොකෙරෙන බව ද ජනතාව පවසති.