බොහොමයක් සහල් වර්ග මරඳගහමුල තොග වෙළඳපොළේ මිලදී ගැනීමට නොමැති වීම නිසා එහි තොග වෙළඳසල්වලින් කිහිපයක් පමණක් ඊයේ (18 වැනිදා) විවෘතව තිබී ඇත.මේ අතර මරඳගහමුල සහල් සංගමයේ සභාපති වී.කේ. රංජිත් ඊයේ මාධ්‍ය හමුවක් කැඳවමින් ප්‍රකාශ කළේ මේ වනවිට එහි වෙළෙඳසල් තුනක් පමණක් විවෘතව තිබූ බවය.

"කීරි සම්බා, කැකුළු සම්බා වැනි වර්ග දෙකක් පමණක් තමයි වෙළඳපොළේ තියෙන්නේ. මේ වන විට අප සතුව ඇති වී සහල් බවට පත්කොට වෙළෙඳපොළට නිකුත් කොට අවසානයි. මරඳගහමුල සහ නිෂ්පාදනය කරන අයගේ මේ වන විට බොහොමයක් වැසී ගොස්. මරඳගහමුල නගරයේ සිල්ලර වෙළඳසල්වලත් හාල් තියෙන්නේ සුළු ප්‍රමාණයක්. පාලනයකට යටත්ව සහල් නිෂ්පාදනය කරන්න අපිට වී ලැබෙන්නෙ නෑ. දැන් වී කිලෝ එකක් රුපියල් 150ක් විතර වෙනවා. ඒ මිලට වී ගෙනත් අපිට සහ නිෂ්පාදනය කරලා විකුණන්න බැහැ. දැන් වීමෝල් අක්‍රිය වෙලා සති දෙකකටත් වඩා වැඩි කාලයක්. අපේ වෙළෙඳසල්වල තිබූ හාල් සියලුම තොග විකුණලා ඉවරයි. දැන් තියෙන්නේ කීරි සම්බා වර්ග විතරයි. අලුත් අස්වැන්න එනකල් අපේ මෝල් දිගටම වහලා තමයි තියන්න වෙලා තියෙන්නේ. අනිත් සහල්වල හිඟය නිසා කීරි සම්බවල මිලත් ඉහළ යයි. අද පොඩි පොඩි මෝල් හිමියන්ට වී ඇටයක්වත් ලැබෙන්නේ නැති හින්දා ඉතා දරුණු තත්ත්වයක් උදා වෙලා තියෙන්නේ. මේ ආනයනික හාල් වෙළෙඳපොලට ආවනම් මේ සැඟවිලා තියෙන වී ටිකත් එළියට එනවා." යැයිද සභාපතිවරයා සඳහන් කළේය.