රටේ වාර්ෂික පොල් නිෂ්පාදනය පොල් ගෙඩි බිලියන තුනයි දශම දෙකක් – බිලියන තුනයි දශම හතරක් (3.2 - 3.4) පමණ වන බවත් වර්ෂයකට රටේ පොල් අවශ්‍යතාව පොල් ගෙඩි බිලියන එකයි දශම හතක් – එකයි දශම නවයක් (1.7 - 1.9) බවත් බුද්ධික මහතා පසුගිය සිකුරාදා (13දා) කොළඹ පැවැති මාධ්‍ය හමුවකදී පැවැසීය.

සෑම වර්ෂයකම ඉහත මාස පහ තුළ පොල් හිඟය ගැන කතා කළත් පෙබරවාරිවලින් පසු රටේ පොල් අස්වැන්න වැඩිවන නිසා පොල් මාතෘකාව නැතිව යන බවත්, එම නිසා සෑම වසරකම රිළා සහ දඬුලේනා මාතෘකාවට මුල්තැන නොදී හිඟවන කාලයට පොල් අපනයනය සීමා කර හෝ නතර කර මෙරට පාරිභෝගිකයන්ට මුල්තැන දීමට පොල් සංවර්ධන අධිකාරිය කටයුතු කළ යුතු බවත් ඔහු කීය.

රිළවුන්ගෙන් සහ දඬුලේනුන්ගෙන් පොල් වගාවට හානි වන බව තමා ද කියා සිටින බවත්, එහෙත් පොල් හිඟයට ප්‍රධානම හේතුව පොල් සංවර්ධන අධිකාරියේ ඇතැම් නිලධාරීන්ගේ අකාර්යක්ෂමතාව බවටත් ඔහු චෝදනා කළේය.

එහි ඇතැම් නිලධාරීන් බහුජාතික සමාගම්වලට වාසි වන ලෙස පොල් අපනයනය කිරීමට සහයෝගය ලබාදෙන බවත් එසේ අපනයනය කළත් ඊට සරිලන විදේශ විනිමය රටට නොලැබෙන බව තමා පමණක් නොව විගණකාධිපති දෙපාර්තමේන්තු වාර්තාවලින් පෙන්වා දී තිබෙන බවත් ඔහු කීය. ඒ පිළිබඳ තොරතුරු තමන් සතුව තිබෙන බව ද බුද්ධික ද සිල්වා මහතා පැවැසීය.

දිවයින