මෙම වසර පුරාම කළුබෝවිල ශික්‌ෂණ රෝහලේ පිරිසිදු කිරීමේ කටයුතු ලබාදී ඇති සමාගමෙහි අකාර්යක්‌ෂමතාවය පිළිබඳව රෝහලේ බලධාරීන්ගෙන් මෙන්ම කාර්ය මණ්‌ඩලයෙන්ද සෞඛ්‍ය අමාත්‍යාංශය වෙත පැමිණිලි ලැබී තිබිණි.
එවැනි වාතාවරණයක්‌ තුළ මෙතෙක්‌ පිරිසිදු කිරීමේ සමාගම අකාර්යක්‌ෂම බව කියමින් පැමිණිලි කර තිබූ රෝහලේ බලධාරීන්ම සිය ස්‌ථාවරය හදිසියේ වෙනස්‌ කරමින් අදාළ සමාගම පිරිසිදු කිරීමේ කටයුතු හොඳින් පවත්වාගෙන යන බවට සෞඛ්‍ය අමාත්‍යාංශයට නිර්දේශ කිරීම සම්බන්ධයෙන් කරුණු පැහැදිලි කරන ලෙස සෞඛ්‍ය අමාත්‍යාංශයේ ඉහළ නිලධාරීන් විසින් ඉකුත් සිකුරාදා (12 දා) කළුබෝවිල ශික්‌ෂණ රෝහලේ අධ්‍යක්‌ෂවරයා වෙත ලි ත දැනුම් දීමක්‌ කර තිබේ.
රෝහලේ පරිපාලන නිලධාරිවරයාට රෝහල් පිරිසිදු කිරීමේ සමාගම විසින් ලබාදුන් බව කියන රුපියල් මිලියන 2 ක අල්ලස්‌ මුදල හේතුවෙන් රෝහලේ බලධාරීන් එම සමාගම පිළිබඳ සිය කලින් ස්‌ථාවරය හදිසියේ වෙනස්‌ කිරීම ගැන සොයා බලන ලෙස කළුබෝවිල රෝහලේ හෙද පරිපාලනයද සෞඛ්‍ය අමාත්‍යාංශය වෙත පැමිණිලි කර ඇතැයි වාර්තා වේ.
චෝදනාවට ලක්‌ව ඇති කළුබෝවිල ශික්‌ෂණ රෝහලේ පිරිසිදු කිරීමේ කටයුතු පවත්වාගෙන යන සමාගම විසින් ලබන වසර සඳහා පිරිසිදු කිරීමේ කටයුතු පවත්වාගෙන යාම වෙනුවෙන් ඉදිරිපත් කර තිබූ ටෙන්ඩරයේ වටිනාකම රුපියල් මිලියන 30 කි.
