''ජාතික ජන බලවේගය වේදිකාවේ ඉදිරිපත් කළ කරුණු කාරණා හා පාර්ලිමේන්තුවේදි ඉදිරිපත් කළ ආණ්ඩුවේ ප්‍රතිපත්ති ප්‍රකාශයේ කරුණු අතර පරස්පරතාවක් දකිනවා. ජාත්‍යන්තර මූල්‍ය අරමුදල සමඟ ගනුදෙනු කිරීමේදී මෙන්ම ද්විපාර්ශ්වීය ණය, ස්වෛරී බැඳුම්කර ණය පිළිබඳව ඉදිරිපත් කළ කරුණු කාරණා පිළිබඳව අපි තිගැස්මකට ලක්වුණා.

ඔවුන් වේදිකාවේ කිවුවේ පවතින IMF ගිවිසුම් රටාව වෙනස් කර අලුත් වැඩපිළිවෙළකට යමු කියන කරුණයි. නමුත් රජය අද එයින් බැහැර වීම බරපතළ කරුණක්.

වාර්තාගත ජනවරමක් තුළින් පෙනෙන්නේ IMF ගිවිසුම සමඟ දකින්නට තිබෙන පීඩාකාරි අසහනකාරී ක්‍රියාදාමයන්වල වෙනසක් රටම බලාපොරොත්තු වුණ බව. නමුත් අසන්නට ලැබුණේ පෙර රජය අනුගමනය කළ ක්‍රියාදාමයම ඔවුනුත් අනුගමනය කරන බව.

රටේ ජනතාව ජනවරමක් දුන්නේ හිටපු ජනාධිපතිවරයා හා පැවැතුණු රජය ක්‍රියාත්මක කළ IMF ගිවිසුම යළි ක්‍රියාත්මක කිරීමට නෙමෙයි. අපි කිව්වේ IMF රාමුව තුළ මේ පවතින ගිවිසුමේ සාධනීය වෙනසක් ඇති කරන බවක්. නමුත් ජනාධිපතිවරයාගේ කතාවෙන් ඉස්මතු වුණේ පැරණි ආකාරයම ඉදිරියට යන බවයි. ජනාධිපතිවරයාගේ කතාවේ දුප්පත්කම තුරන් කිරීම, ගර්භනි මව්වරුන්, දරුවන් වෙනුවෙන් සහන සැලසීම, මන්ද පෝෂණය තුරන් කිරීම , දේශීය කර්මාන්තකරුවන් දිරිගැන්වීම යන කරුණු කාරණා තිබුණා. ඒවා හොඳයි. නමුත් වැදගත් වන්නේ කතාව ක්‍රියාවට නැංවීමයි. හොඳ දේ ක්‍රියාවට නැංවීමේදි අපි සහයෝගය ලබා දෙනවා. නමුත් අපි පුදුමයට පත් වන්නේ මොවුනුත් පවතින IMF ගිවිසුම ක්‍රියාත්මක කිරීමට බැඳි සිටීම ගැනයි. එය බරපතළයි. ජනවරම ලැබී තිබෙන මොහොතේ IMF හිත දිනාගෙන ජන හිතකාමි ආකාරයට සංශෝධන කරමින් වෙනස් කිරීමයි වැදගත් වන්නේ.''

silumina