මේ දිනවල වෙළෙඳ පොළේ පොල් ගෙඩියක මිල රුපියල් 130 , 160 ත් අතර මිලක් දක්වා ඉහළ ගොස් තිබේ.
මෙරට වාර්ෂික පොල් නිෂ්පාදනය දල වශයෙන් පොල් ගෙඩි බිලියන 03 ක් වේ.
රටේ නිෂ්පාදනය වන පොල් ප්‍රමාණයෙන් සැලකිය යුතු ප්‍රමාණයක් පොල් තෙල් නිෂ්පාදනය සඳහා යොදා ගැනේ. පොල් තෙල් කිලෝ ග්‍රෑමයක් නිෂ්පාදනය කිරීමට පොල් ගෙඩි 10 ක් අවශ්‍ය වේ.
මේ දිනවල රටේ වැසි තත්ත්වය පැවතීම නිසා පොල් නිෂ්පාදනය ඉහළ මට්ටමක පැවැතියත්, පොල් හිඟයක් මවා කෘතිමව පොල් මිල ඉහළ දැමීමේ ජාවාරමක් ක්‍රියාත්මක වන බවටද තොරතුරු අනාවරණය වේ.
රටේ පොල් තෙල් නිෂ්පාදන කටයුතු සඳහා කපන ලද පොල් මද ඉන්දුනීසියාව, පිලිපීනය, මැලේසියාව ආදී රටවල්වලින් ආනයනය කිරීමට ඉකුත් රජය සමයේදී කර්මාන්ත අමාත්‍යාංශයේ සාකච්ඡා වට කීපයක් පැවති අතර, එම වැඩපිළිවෙළ ක්‍රියාත්මක නොවීය. කපන ලද පොල් මද ආනයනය කර පොල් තෙල් නිෂ්පාදනය කිරීමට කටයුතු කළේ නම් පොල් තෙල් නිෂ්පාදනය සඳහා රටේ පොල් නිෂ්පාදනය විශාල ලෙස යොදා ගැනීමට අවශ්‍ය නොවන බවද පැවසේ.
පොල් මිල ඉහළ යාම පාලනය කිරීම සඳහා රජයේ ආයතනවලට අයත් වතුවල තිබෙන පොල් නාගරික ප්‍රදේශවලට ගෙනැවිත් අලෙවි කිරීමට රජය සැලසුම් කර ඇතැයි කැබිනට් මාධ්‍ය ප්‍රකාශක, ඇමැති විජිත හේරත් පසුගියදා කියා සිටියේය.
කෙසේ නමුත්, එම වැඩපිළිවෙළද මෙතෙක් ක්‍රියාත්මක කර නැත.
-p.m
