මේ දිනවල ඌව පළාතේ බදුල්ල දිස්ත්‍රික්කය තුළ හදිසි රාජ්‍යය උත්සව පැවැත්වී සම්බන්ධයෙන් එක්සත් ජාතික පක්ෂය විසින් මැතිවරණ කොමසාරිස්වරයා වෙත පැමිණිල්ලක් ඉදිරිපත් කර ඇතැයි වාර්තා වේ. පැමිණිල්ලක් ඉදිරිපත් කරමින් එක්සත් ජාතික පක්ෂයේ සිරිකොත මැතිවරණ මෙහෙයුම් මැදිරිය පෙන්වා දෙන්නේ මේ ආකාරයට රාජ්‍යය උත්සව පැවැත්වීම මගින් මැතිවරණ නීති උල්ලංඝණය වන බවයි.
බදුල්ල දිස්ත්‍රික්කයේ කුඩා තේ වතු හිමියන්ගේ සංගමය කැඳවා පස සංරක්ෂණය සඳහා ආධාර ලබාදීමේ වැඩපිළිවෙළක් ලබන 14 සහ 15 යන දින වල සිදු කිරීමට සැලසුම් කර ඇති බව එක්සත් ජාතික පක්ෂය මැතිවරණ කොමසාරිස්වරයා වෙත දැනුම් දී ඇත.
එමගින් ඌව පළාත් සභා ඡන්ද විමසීමට අදාළව මැතිවරණ නීති උල්ලංඝණය වන බැවින් එවැනි උත්සව නතර කිරීමට පියවර ගන්නා ලෙස ද එක්සත් ජාතික පක්ෂය මැතිවරණ කොමසාරිස්වරයාගෙන් ඉල්ලා සිටියි.
මේ අතර පොලිස් මැතිවරණ ලේකම් කාර්යාලයට ඌව පළාත් ඡන්ද විමසීමට අදාළව පැමිණිලි 63ක් ලැබි ඇති අතර ඒ සම්බන්ධයෙන් පුද්ගලයින් 42 දෙනෙකු අත්අඩංගුවට ගෙන ඇත.
වැඩිම පැමිණිලි සංඛ්‍යාවක මොණරාගල දිස්ත්‍රික්කයෙන් ලැබී ඇති බව පොලිස් මැතිවරණ කාර්යාලය පවසයි.
මේ අතර ඌව පළාත් සභා ඡන්ද විමසීමට අදාළ සියලු ප්‍රචාරක කටයුතු ලබන 17 වැනිදා මධ්‍යම රාත්‍රි 12න් පසු නතර කළ යුතු බව මැතිවරණ මහ ලේකම් කාර්යාලය පවසයි.
ලබන 18 වැනිදා මධ්‍යම රාත්‍රිය දක්වා පමණක් අවසර ලැබු මැතිවරණ කාර්යාල පවත්වාගෙන යා හැකි බව මැතිවරණ මහ ලේකම් කාර්යාලය සඳහන් කරයි.
