16 හැවිරිදි මෙම සිසුවාගේ මරණය සැක සහිත බැවින් ඊට කිසිදු පියවරක් ලිඳුල පොලිසිය විසින් නොගෙන ඇති බව පවසමින් එම ප්‍රදේශවාසීන් පසුගිය දින උද්ඝෝෂණයක පවා නියැළුණි.


මෙම දරුවා හට මවුපියන් විසින් නිතර නිතර ඉගෙනීම් කටයුතු සඳහා බල කිරීම් කරනු ලබන බවත්, ඒ හේතුවෙන් ඔහු මවුපියන්ගෙන් එල්ලවන මෙම පීඩනය හමුවේ මහත් ලෙස මානසික අපහසුතාවකට පත්ව ඇති බවටද පොලිසියට අනාවරණය වී තිබේ.


මෙම පීඩනය දරා ගැනීමට නොහැකිව එම දරුවා නිවෙසින් පිටව ගොස් කොත්මලේ ජලාශයට පැන ඇති බවත් පොලිසිය පවසයි.


පශ්චාත් මරණ පරීක්‍ෂණයේදී එම දරුවාගේ බාහිර සිරුරේ හෝ සිරුර අභ්‍යන්තරයේ කිසිදු තුවාලයක් සිදු නොවී ඇති බවට අනාවරණය වී ඇති බවත්, ඔහු මිය යෑමට ප්‍රථමයෙන් නිවෙසේදී ආහාරයට ගනු ලැබූ බත් සහ පරිප්පුද ආමාශයේ තිබී මරණ පරීක්‍ෂණයේදී අනාවරණය වූ බවත් එම නිලධාරියා කීය.


ගම්වැසියන් මේ සිද්ධියට අදාළව පොලිසියට චෝදනා නැඟුවද මෙම දරුවා අතුරුදන් වීමට අදාළ පැමිණිල්ල පොලිස් නිලධාරීන්ම ගොස් එම නිවැසියන්ගෙන් අදාළ කරුණු විමසා පැමිණිල්ල සටහන් කරගෙන ඇති බවද ඔහු කීය.


මෙම දරුවා නිවෙසින් බැහැර කිරීමට තියා සෙල්ලම් කිරීම සඳහාවත් මවුපියන් විසින් ඔහු පිටත් කර නොමැති බවත්, දරුවා නිවෙස තුළම රඳවා ගනිමින් ඉගෙනීමට පමණක් ඔහුගේ මනස හැඩගස්වා ඇති බවටද පොලිසියට අනාවරණය වී ඇත.