තිස් (30) අවුරුදු බදු පදනම මත ලබා දි ඇති මෙම ඉඩම් ප්‍රමාණයෙන් මසකට රුපියල් මිලියන 1.75 ක මුදලක් ආදායම් වශයෙන් ලැබෙන බව ශ්‍රි ලංකා වරාය අධිකාරිය අවධාරණය කරයි. මෙම ව්‍යාපෘතියට අදාල ගිවිසුම ශ්‍රි ලංකා වරාය අධිකාරිය සහ ශ්‍රි ලාංකික සමාගමක් වන “සීලෙක්ස් රිනිව්වබල්ස්” සමාගමෙහි අනුසමාගමක් වන “සන් ස්කේප්” (Sun Scape) ව්‍යාපෘති සමාගම විසින් වරාය, නාවික හා ගුවන්සේවා අමාත්‍යාංශ ශ්‍රවණාගාරයේ දී ඊයේ (24) අත්සන් කර තිබෙයි.
මෙම ගිවිසුම අත්සන් කිරීමෙන් අනතුරුව අමාත්‍ය නිමල් සිරිපාල ද සිල්වා මහතා කරුණු දක්වමින් කියාසිටියේ : ශ්‍රී ලංකාවේ විදුලිබල අර්බුදයට පිලියමක් ලෙස පුනර්ජනනීය බලශක්තිය නිපද විය යුතු බව, වත්මන් රජයේ ජාතික බලශක්ති ප්‍රතිපත්තිය මඟින් පිලි අරගෙන ඇති බවයි.
ඒ අනුව 2030 වසර වන විට ශ්‍රී ලංකාවට අවශ්‍ය බලශක්තියෙන්, 70% ක් පුනර්ජනනීය බලශක්තිය තුලින් ලබා ගැනීමට බලාපොරොත්තු වන බව හෙතෙම පැවසීය. එම ක්‍රියාවලියට මාගේ අමාත්‍යාංශයත්,වරාය අධිකාරියත් සතු, වෙනත් කාර්යයන් සඳහා පරිහරණයට ගත නොහැකි ඉඩම් තෝරාගෙන ආයෝජකයින් හට ලබා දීමේ ක්‍රියාවලියක් ආරම්භ කර ඇති බව අමාත්‍යවරයා මෙහිදී පැවසීය.
එම වැඩපිළිවෙළ යටතේ ත්‍රිකුණාමලය වරාය සතු කප්පල්තුර ප්‍රදේශයේ හෙක්ටයාර් 43 ක ඉඩමක් ශ්‍රී ලාංකික සමාගමක් වෙත තිස් අවුරුදු බදු පදනම මත ලබා දි ඇති බවත්, ඒ තුලින් මාසිකව රුපියල් මිලියන 1.75 ක ආදායමක් වරාය අධිකාරිය වෙත ලැබෙන අතර , එමඟින් ජාතික ආර්ථිකයට සුවිශේෂි දායකත්වයක් ලබා දීමට හැකිවන බවද අමාත්‍යවරයා කියා සිටියේය.
වරාය, නාවික හා ගුවන්සේවා අමාත්‍ය නිමල් සිරිපාල ද සිල්වා මහතාගේ ප්‍රධානත්වයෙන් පැවති මෙම ගිවිසුම අත්සන් කිරීමේ අවස්ථාවට ශ්‍රි ලංකා වරාය අධිකාරියේ සභාපති කීත්.බර්නාඩ්, කලමණාකාර අධ්‍යක්‍ෂ ප්‍රභාත් මලවිගේ සහ සීලෙක්ස් රිනිව්වබල්ස් සමාගමේ ප්‍රධාන විධායක නිලධාරී සමීර ගනේගොඩ යන මහත්වරුන් ඇතුළු පිරිසක් සහභාගී විය.
- දිනමීන
