ගාල්ල බන්ධනාගාරගතව සිටි රැඳවූවකු උණ රෝගය වැල ඳී කරාපිටිය ශික්ෂණ රෝහලේ ප්‍රතිකාර ලබමින් සිටියදී මියගොස් තිබේ. එම රැඳවූවා මොළේ උණ රෝගය වැලඳීමෙන් මියගොස් ඇති බව පශ්චාත් මරණ පරීක්ෂණයේ දී අනාවරණය වී ඇත. බන්ධනාගාරයේ සිටි තවත් රැඳවූවන් දෙදෙනකු උණ රෝගය වැලඳීමෙන් කරාපිටිය ශික්ෂණ රෝහලට ඇතුළත් කොට ඇති අතර එම රැඳවූවන් දෙදෙනාටද මොළේ උණ රෝගය වැළ ඳී ඇති බව තහවුරු වී තිබෙන බව බන්ධනාගාර ආරංචි සඳහන් කරයි.
මේ හේතුවෙන් ගාල්ල බන්ධනාගාර කාර්යාලය පවසන්නේ මෙම කාලය තුළ අමුත්තන් බැලීමේ කටයුතු සීමා කර තිබෙන අතර බන්ධනාගාර කොමසාරිස් ජනරාල්වරයාගේ උපදෙස් මත ගාල්ල බන්ධනාගාරයේ කටයුතු සීමා කිරීමට පියවර ගෙන ඇති බවයි.
ගාල්ල බන්ධනාගාරයට රැගෙන එනු ලබන නවක රැඳවූවන් අඟුණකොළපැලැස්ස බන්ධනාගාරය වෙත මාරු කිරීමට පියවර ගෙන ඇති අතර අධිකරණයට ඉදිරිපත් කළ යුතු රැඳවූවන් ස්කයිප් තාක්ෂණය ඔස්සේ අධිකරණයට ඉදිරිපත් කිරීමට නියමිතව තිබේ.
