ඊයේ උදෑසන රථ වාහනවලින් බොරලන්ද ප්‍රදේශයේ සිට වැලිමඩ නගරයට විරෝධතාවකට පැමිණි ගොවීන් සමඟ නියෝජ්‍ය අමාත්‍යවරයා එරබද්ද පාලම අසලදී විරෝධතාව පිළිබඳ සාකච්ඡා කිරීමට පැමිණියේය. මෙහිදී ගොවීන් තමන් පත්වී ඇති අස්ථාවර තත්ත්වය සතොස මඟින් අර්තාපල් මිලදී ගැනීම ක්‍රමානුකූලව සිදු නොවන බවත් අමාත්‍යවරයා හට පහදා දුන්නේය. අමාත්‍යවරයා උද්ඝෝෂණය නතර කරන ලෙසත් අදාළ පාර්ශ්ව සමඟ සාකච්ඡා කර විසඳුමක් ලබාදෙන බවත් කීය.
එමෙන්ම විශාල ලෙස අර්තාපල් අස්වනු නෙළන්නේ නොමැතිව ක්‍රමානුකූලව අස්වනු නෙළා රැගෙන එන ලෙස ගොවීන් හට පැවැසීය.
මෙහිදී උරණ වූ ගොවීහු අමාත්‍යවරයා හට බලවත් ලෙස විරෝධය පා කෑකෝ ගසමින් 'හූ' කියන්නට වූහ.
එම අවස්ථාවේදී අදාළ ස්ථානයෙන් ඇමැතිවරයා ඉවත්ව ගිය අතර ගොවීහු කැප්පෙටිපොළ ආර්ථික මධ්‍යස්ථානයටද අනතුරුව වැලිමඩ නගරයේද විරෝධතාවයේ නිරත වූහ.
අර්තාපල්වලට ස්ථීර මිලක් ලබාදෙන ලෙස හා සතොස මඟින් ක්‍රමවත් ආකාරයට දේශීය අර්තාපල් මිල දී ගන්නා ලෙස ඉල්ලා වැලිමඩ ප්‍රදේශයේ අර්තාපල් ගොවීන් පැවැත්වූ විරෝධතා පා ගමන සාකච්ඡා කර විසඳීමට ගිය නියෝජ්‍ය අමාත්‍ය ලසන්ත අලගියවන්න මහතා හට ගොවීන්ගෙන් එල්ල වූ දැඩි විරෝධතාව හමුවේ පසුබැස යෑමට සිදු විය.
Leave a comment
