පසුගියදා කෘෂිකර්ම සහ වැවිලි කර්මාන්ත අමාත්‍ය මහින්ද අමරවීර පවසා තිබුණේ ආහාර මත පනවා ඇති බද්ද ලබන මාසයේදී අඩුකරන බව ජනාධිපති රනිල් වික්‍රමසිංහ මහතා කැබිනට් මණ්ඩලයට දැනුම් දුන් බවය.
රජය මුහුණ දුන් දැවැන්ත ආර්ථික අර්බුදයෙන් පසුව මේ වන විට රජයේ මූල්‍ය ස්ථාවරත්වය ශක්තිමත් වී ඇතැයි ජනාධිපතිවරයා කැබිනට් මණ්ඩලයට අණාවරණය කර තිබු අතර රටට ආදායමක් එන ආයෝජන සිදු කිරීම සඳහා මේ වන විට රුපියල් බිලියන 300 ක් වෙන් කර තිබෙන බව සඳහන් කර තිබිණි.
ඒ අනුව ආහාර මත පනවා තිබෙන බදු අඩු කිරීමට අමතරව විදුලි බිල අඩු කිරීම,ඉන්ධන මිල අඩු කිරීම වැනි සහනද ලබන මාසයේදී ජනතාවට ලබාදෙන බව ජනාධිපතිවරයා කැබිනට් මණ්ඩලය හමුවේ පවසා ඇත.
ඩොලරයට සාපේක්ෂව රුපියලේ අගය 300-280 අතර අගයක පවත්වාගෙන යාම තම ඉලක්කය බව සඳහන් කර ඇති ජනාධිපතිවරයා එසේ වුවහොත් බඩු මිල තවදුරටත් අඩුවන බව පැවැසූ බවත් මහින්ද අමරවීර මහතා පැවසීය.
මේ වන විටත් මේ සම්බන්ධයෙන් ජනාධිපතිවරයාගේ උපදෙස් මත මුදල් අමාත්‍යංශය සහ මහ බැංකුව එක්ව සැලසුම් සකසමින් සිටින බව දැනගන්නට තිබේ. කෙසේ වෙතත් තෙල් සහ විදුලිය සහන මේ මස ලබාදීමට ආණ්ඩුව මීට පෙර සූදානම් වී සිටියත් අප්‍රේල් මාසයේ මෙම සහන මල්ල සමඟ එකවර ලබාදීමට අදාළ ආයතන තීරණය කර ඇත.
