ඉන් ප්‍රධානතම යෝජනාව වනුයේ දේශගුණික විපර්යාස විශ්වවිද්‍යාලයක් (Climate Change university) මෙරට ඇති කිරීමය.

ඊට අමතරව දියුණු රටවල ක්‍රියාකාරකම් හේතුවෙන් අපහසුතාවයට පත්වන තුන්වන ලෝකයේ රටවල් වෙනුවෙන් දේශගුණික යුක්ති සංසදයක් (Climate Justice Forum) පිහිටුවීම හා නිවර්තන කලාපය වෙනුවෙන් සංසදයක් (Tropical Belt Forum) පිහිටුවීමේ යෝජනා ත්‍රිත්වය ජනාධිපති රනිල් වික්‍රමසිංහ විසින් කොප් 28 සමුළුව වෙත ඉදිරිපත් කිරීමට නියමිතය.

කොප් 28 සමුළුව රාජ්‍යයන් 54ක නායකයන්ගේ සහභාගීත්වයෙන් ලබන 04 දා සිට ඩුබායිහීදි පැවැත්වෙන අතර, එහිදී දේශගුණික විපර්යාස ගැන මෙන්ම ණය ස්ථායිකරණය ගැන අතිරේක සාකච්ඡාවන් කිහිපයක් පැවැත්වීමට ද සැලසුම් කොට තිබේ.

මෙහිදී රාජ්‍ය නොවන සංවිධානයන්හි අනුග්‍රාහකත්වය යටතේ තරුණ තරුණියන් 20ක් සහභාගීවීමට නියමිත අතර, ඔවුන් මෙම අතිරේක සාකච්ඡාවන්ට සහභාගීවීමට නියමිතය. රජය නියෝජනය කරමින් ජනාධිපති රනිල් වික්‍රමසිංහ, විදේශ ඇමැති අලි සබ්‍රි, විදුලිබල හා බලශක්ති ඇමති කංචන විජේසේකර, පරිසර ඇමති කෙහෙළිය රඹුක්වැල්ල, පාඨලි චම්පික රණවක, පරිසර අමාත්‍යාංශයේ ලේකම් වෛද්‍ය අනිල් ජාසිංහ, දේශගුණික විපර්යාස පිළිබඳ ජනාධිපති උපදේශක රුවන් විජයවර්ධන, ජනාධිපති විදේශ කටයුතු අධ්‍යක්ෂ දිනුක් කොළඹගේ යන අය ඇතුළු 15ක පමණ දූත පිරිසක් මේ සඳහා සහභාගීවීමට නියමිතය.

පෞද්ගලික අංශයෙන් තවත් පිරිසක් සිය වියදමෙන් මෙම සමුළුවට සහභාගීවීමට නියමිත බව දේශගුණික විපර්යාස පිළිබඳ ජනාධිපති ජ්‍යෙෂ්ඨ උපදේශක රුවන් විජයවර්ධන මහතා සඳහන් කරයි.

අරගලයෙන් ඉල්ලා සිටියේ මෙලෙස තරුණ පිරිස් වෙත ජාත්‍යන්තර අත්දැකීම් ලබාදීම බවද රුවන් විජයවර්ධන මහතා සඳහන් කළේය.

- දිනමිණ