මහා පරිමාණ මෝල් හිමියන් විසින් වෙළෙඳ පොළට කීරි සම්බා සහල් නිකුත් නොකර සඟවා තබාගැනීම හේතුවෙන් වෙළෙඳ පොළ තුළ මේ වනවිට කීරි සම්බා සහ සම්බා සහල් හිඟයක් නිර්මාණය වී ඇති බැවින් මෙම පියවර ගත් බව වාණිජ හා ආහාර සුරක්ෂිතතා කටයුතු අමාත්‍ය නලින් ප්‍රනාන්දු පවසයි.
ඒ අනුව උත්සව සමය තුළ සහල් හිඟය මඟහරවා ගැනීමට සහල් ආනයනය කිරීමට පියවර ගෙන ඇති බව වෙළෙඳ, වාණිජ හා ආහාර සුරක්ෂිතතා කටයුතු පිළිබඳ අමාත්‍යාංශයීය උපදේශක කාරක සභා රැස්වීමේ දී අමාත්‍ය නලීන් ප්‍රනාන්දු මහතා පැවසීය.
කීරි සම්බා සහල් වර්ගයට සමාන සහල් වර්ගයක් මෙලෙස ආනයනය කිරීමට නියමිත ව ඇති අතර මේ අනුව සහල් ආනයනය කිරීමට සිදුව ඇතැයි ද ඒ මහතා පැවැසීය.
මේ අතර කෘෂිකර්ම අමාත්‍ය මහින්ද අමරවීර පවසන්නේ වෙළෙඳපොළේ සහල් හිඟයක් නිර්මාණය කිරීමට මෝල් හිමියන් සිදු කරන ක්‍රියාකාරකම් මැඩපැවැත්වීමේ අරමුණින් සහල් ආනයනය කිරීමට අවසර ලබාදීමට සිදු වූ බවයි.
එළඹෙන උත්සවය සමයේ දී සතොස මඟින් පාරිභෝගික ජනතාව වෙනුවෙන් විශේෂ මිල සහන ලබාදීමට කටයුතු කරන බව එහි සභාපති පසඳ යාපා අබේවර්ධන ද පවසා ඇත.
වසර නවයකට පසු ලංකා සතොස මේ වසරේ ගත වූ මාස 10 තුළ ශුද්ධ ලාබයක් ද ලබා ඇති බව පසඳ යාපා අබේවර්ධන සඳහන් කළේය.
-P.M
