මෙවර අය වැයෙන් රාජ්‍ය සේවක වැටුපේ ජීවන අංක දීමනාවට වැඩි කළ රුපියල් 10,000 ක දීමනාව හා විශ්‍රාමිකයන්ට වැඩි කළ රු 2,500 දීමනාව ලබන වසරේ අප්‍රේල් මාසයේ සිට ගෙවීමටත් හිඟ මුදල වාරික වශයෙන් මාස 6ක් තුළ ගෙවීමටත් යෝජනා වී තිබුණි.

පසුගියදා ජනාධිපතිවරයා මුදල් අමාත්‍යංශ නිලධාරීන් සමඟ රටේ මුල්‍ය තත්වය සම්බන්ධයෙන් පැවැති සාකච්ඡාවක්දී මේ බව හෙළි වී ඇත. මෙම සාකච්ඡාවෙන් අනතුරුව ජනාධිපති ලේකම් සමන් එ්කනායකගේ ප්‍රධානත්වයෙන් රාජ්‍ය ආදායම් තත්වය දෛනිකව වාර්තා කිරීම වෙනුවෙන් පත්කර තිබෙන කමි‍ටු සාමාජිකන් රැස්වී මේ පිළිබඳව දීර්ග වශයෙන් සාකච්ඡා කර තිබිණි. ඒ අනුව ජනවාරී මාසයේ සිටම රාජ්‍ය සේවකයන්ට රු 5000 බැගින් සහ විශ්‍රාමිකයන්ට මුළුමනින්මත් යෝජිත දීමනාව ගෙවීමට හැකි බව ජනාධිපති පාර්ලිමේන්තු කටයුතු පිළිබඳ උපදේශක මහාචාර්ය අශු මාරසිංහ පෙන්වා දී ඇති අතර රාජ්‍ය මුදල් ඇමැතිවරුන් වූ රංජිත් සියඹලාපිටිය හා ශෙහාන් සේමසිංහ යන ඇමතිවරුන්ද එය අනුමත කර ඇතැයි දැනගැනීමට තිබේ.