මෙම ව්‍යාපෘතිය යටතේ මාර්ග 13,160ක සංවර්ධන කටයුතු සිදු කරන අතර, එය දුර ප්‍රමාණය අනුව කිලෝමීටර 17,847ක් බවත් මාර්ග 5201ක කිලෝමීටර 9298ක් දුර ප්‍රමාණය සංවර්ධනය කර අවසන් බවත් ඇමැතිවරයා පැවසුවේය.
මාර්ග කිලෝමීටර ලක්ෂය සංවර්ධන ව්‍යාපෘතිය යටතේ සංවර්ධන කටයුතු අවසන් කර නොමැති මාර්ගවල දුර ප්‍රමාණය කිලෝමීටර 11,549ක් බවත් මෙම ව්‍යාපෘතිය යටතේ මාර්ග සංවර්ධන කටයුතු සිදු කළ කොන්ත්‍රාත්කරුවන්ට රුපියල් බිලියන 5ක මුදලක් ගෙවීමට ඇති බවත් ඇමැතිවරයා ප්‍රකාශ කළේය.
ආර්ථික ගැටලු හේතුවෙන් නතර කළ සංවර්ධන ව්‍යාපෘති නැවත ආරම්භ කරන විට ප්‍රමුඛතාව ලබා දිය යුතු මාර්ග හඳුනා ගැනීමේ වැඩපිළිවෙළක් දිස්ත්‍රික්ක මට්ටමින් ක්‍රියාත්මක කර ඇති බව ද ඇමැතිවරයා පැවසුවේය.
පොලොන්නරුව, අනුරාධපුරය දිස්ත්‍රික්ක තුළ මෙම වැඩපිළිවෙළ දැනට ක්‍රියාත්මක කර අවසන් බවත් සෑම දිස්ත්‍රික්කයකම දිසාපතිවරු, ප්‍රාදේශීය ලේකම්වරු, මන්ත්‍රීවරු සම්බන්ධ කර ගනිමින් පළාතේ පිහිටි ප්‍රමුඛතාව ලබාගත යුතු මාර්ග සම්බන්ධයෙන් තොරතුරු ලබා ගැනීමට රැස්වීම් පවත්වන බවත් ඇමැතිවරයා කීය.
ඉංජිනේරුවන්, උසස් නිලධාරීන්, ආයතන ප්‍රධානීන්, රාජ්‍ය පරිපාලන නිලධාරීන් ඒකාබද්ධව මේ වැඩපිළිවෙළ ක්‍රියාත්මක කරන බවත් ජාත්‍යන්තර මූල්‍ය අරමුදලෙන් දෙවැනි ණය වාරිකය ලැබීමෙන් අනතුරුව මෙම සංවර්ධන ව්‍යාපෘති නැවත ක්‍රියාත්මක කළ හැකි බවත් ඇමැතිවරයා ප්‍රකාශ කළේය.
-P.M
