පසුගිය අයවැයට සමගාමීව 2024 අයවැයත් ඉදිරිපත් විය යුතු වුවත් ජනතාවට බරක් නැති අයවැයක් ගැන බලාපොරොත්තුවක් නැති බවයි අත්තනායක කියාසිටියේ.
අයවැයෙන් බලාපොරොත්තු වන්නේ ආර්ථිකයට ඉදිරිපියවරක් තැබීම වුවත් එවැනි දිශාවක් මෙවර අයවැයෙන් පෙන්නුම් නොකරන බවද හෙතෙම සඳහන් කර ඇත.
මේ අතර මෙවර අයවැය ගැන අදහස් දක්වමින් මුදල් රාජ්‍ය අමාත්‍ය රංජිත් සියඹලාපිටිය කියා සිටියේ ජනතාව මුහුණ දෙන කෙටිකාලීන ගැටළු කෙරෙහිත් අවධානය යොමුකරමින් දීර්ඝ කාලීනව රට නගා සිටුවීම පදනම් කරගත් අයවැයක් අද දිනයේදී පාර්ලිමේන්තුවට ඉදිරිපත් කරන බවයි.
එහිදී තවදුරටත් අදහස් දක්වමින් අමාත්‍යවරයා සඳහන් කළේ කෙටි කාලීන ජනප්‍රියතාවය උදෙසා හෝ මැතිවරණ ඉලක්ක කර ගනිමින් මෙවර අයවැය සකසා නොමැති බවත් , ජනාධිපතිවරයා රට භාරගැනීමේදී සඳහන් කළ ආකාරයට දිගු කාලීන ස්ථාවර එමෙන්ම පෙර සේ ආර්ථිකයේ පතුලට නැවත වතාවක් රට නොවැටෙන ආකාරයට කටයුතු කරන බවට කළ ප්‍රකාශය පදනම් කර ගනිමින් මෙවර අයවැය සැකසෙන බවද අමාත්‍යවරයා ප්‍රකාශ කළේය.
සමස්ථ ජනතාව පීඩනයෙන් පසුවන අවස්ථාවක ඒ සඳහා විසඳුම් සෙවීමේ අභියෝගය, දීර්ඝ කාලීනව නැගිටින රටක් බවට රට පත්කිරීමේ අභියෝගය මෙන්ම ඒ සඳහා වියදම් සොයාගැනීමේ අභියෝගයට මුහුණ දෙමින් මෙවර අයවැය සකසා ඇති බව සඳහන් කළ අමාත්‍යවරයා , ඒ සියල්ලට වඩා මෙතෙක් කළත් අයවැය හිඟය පියවා ගැනීම සඳහා රජයට හෝ භාණ්ඩාගාරයට තිබූ අසීමිත අයිතිවාසිකම් මේ වන විට රජයට නොමැති බවත්, සීමිතව ඇති එම අයිතිවාසිකම උපයෝගී කරගනිමින් දේශිය හා විදේශීය වශයෙන් ණය කෙරෙහි අවධානය යොමු කරමින්, අයවැය පරතරය අවම වට්වමක රඳවා ගැනීමේ අභියෝගටද දැඩිව මුහුණ දෙමින් මෙවර අයවැය සකස් කළ බවද එහිදී සඳහන් කළේය.
කෙසේ වෙතත් සහන අවශ්‍ය දිලිඳු ජනතාව කෙරෙහිද වැඩි අවධානයක් යොමුකර ඇති බව සඳහන් කළ අමාත්‍යවරයා විදේශ ණය ප්‍රතිව්‍යුහගතකරණයද ධණාත්මක තැනකට පැමිණ ඇති බවත්, පැලැස්තර ක්‍රමවේද වලට නොගොස් ජාතියක් විදිහට සැවොම එක්ව නැගීටීමට පෙල ගැසෙන ලෙස ජනතාවට ආරාධනා කරන බවද ඔහු පවසා තිබේ.
-P.M
