ඒ අනුව, සුදු සීනි සඳහා රුපියල් 275ක් සහ දුඹුරු සීනි කිලෝග්‍රෑමයක් සඳහා උපරිම සිල්ලර මිල රුපියල් 330ක් ලෙස අලෙවි කරන ලෙස සිල්ලර වෙළෙඳුන්ට පාරිභෝගික කටයුතු අධිකාරිය නියෝග කර තිබේ.

මෙම හදිසි බදු වැඩිවීම හේතුවෙන් සීනි කිලෝවකින් රුපියල් 40ක පාඩුවක් සිදුවන බැවින්, අනාගත ආනයන ඇණවුම් අවලංගු කිරීම හැර වෙනත් විකල්පයක් නොමැති බව ආනයනකරුවන් පෙන්වා දෙන අතර, නත්තල් සහ අලුත් අවුරුදු කාලවලදී රට තුළ සීනි හිඟයක් ඇති විය හැකි බවට ඔවුන් අනතුරු අඟවයි.

කෙසේවෙතත් මේ හේතුවෙන් වෙළෙඳ අමාත්‍ය නලින් ප්‍රනාන්දු අවධාරණය කර සිටියේ සීනි තොග නිකුත් නොකරන සියලුම ගබඩාවලට මුද්‍රා තැබීමට අවශ්‍ය පියවර ගන්නා බවයි.

සීනි සඳහා මෑතකදී හඳුන්වා දුන් උපරිම සිල්ලර මිලට එරෙහිව කරන එවැනි උත්සාහයන් හෙලා දකින බව අමාත්‍යවරයා සඳහන් කළේය.

අලෙවිකරුවන් කිහිප දෙනෙකු විසින් නියමිත ප්‍රමාණයට වඩා වැඩි මිලට සීනි අලෙවි කරන බවට තොරතුරු ලැබී ඇති බවත්, එවැනි වෙළෙන්දන්ට එරෙහිව ද පියවර ගන්නා බව ඔහු සදහන් කර ඇත.

පාරිභෝගික කටයුතු අධිකාරිය නොවැම්බර් 03 වැනි දින අතිවිශේෂ ගැසට් පත්‍රයක් මගින් සුදු සහ දුඹුරු සීනි සඳහා පාලන මිල නියම කළේය.

ඒ අනුව ඇසුරුම් කළ සහ ඇසුරුම් නොකළ දුඹුරු සීනි පිළිවෙලින් රු. 350/kg සහ රු. 330/kg ක් වන අතර, ඇසුරුම් කළ සහ ඇසුරුම් නොකළ සුදු සීනි රු. 295/kg ක් සහ රු. 275/kg, මීළ ගණන් සංශෝධය වී ඇත.

-P.M