මෙම කටයුතු පිළිබඳ සාකච්ඡාවක් කෘෂිකර්ම අමාත්‍යාංශයේ දී පැවැති අතර එම සාකච්ඡාව කෘෂිකර්ම හා වැවිලි කර්මාන්ත අමාත්‍ය මහින්ද අමරවීරගේ ප්‍රධානත්වයෙන් පැවැත්වුණා.
එම අවස්ථාවට IESC ආයතනයේ ප්‍රධාන විධායක හා සභාපති David Hartinchමහතා ඇතුළු පිරිසක් සහභාගි වුණා.
විශේෂයෙන් අප රටේ දිනකට ලීටර් 100ක් පමණ කිරි නිෂ්පාදනය කරන කුඩා පරිමාණ කිරි ගව පාලනය කරන ඒකකවල ධාරිතාවය ඉහළ නැංවීම, නව තාක්ෂණය හා අවශ්‍ය තාක්ෂණික හා මුල්‍යමය සහයෝගිතාවය ලබා දීම එම IESC ආයතනය විසින් සිදු කරනු ලබයි.
කෘෂිකර්ම අමාත්‍යාංශය මෙන්ම ආරක්ෂක අමාත්‍යාංශය යටතේ ඇති කුඩා පරිමාණ කිරි නිෂ්පාදන ඒකක මෙම වැඩ පිළිවෙළ සඳහා ඒකරාශි කර ගැනීමට නියමිතයි.
ප්‍රජාව ශක්තිමත් කිරීම සඳහා ආර්ථික තත්ත්වය ඉහළ නැංවීම තම සංවිධානයේ අරමුණ වන අතර කිසිසේත්ම ලාභ ඉපයීමේ අරමුණක් තම සංවිධානයට නොමැති බව මෙම අවස්ථාවට එක්වෙමින් IESC ආයතනයේ ප්‍රධාන විධායක හා සභාපති David Hartinch සඳහන් කළා.
මේ සඳහා අවශ්‍ය මුල්‍ය ප්‍රතිපාදන එක්සත් ජනපද කෘෂිකර්ම දෙපාර්තමේන්තුව මගින් ලබා දෙන අතර IESC ආයතනය විසින් එම සියලුකටයුතු මෙහෙයවනු ලබයි.
මේ වනවිට දිනකට කිරි ලීටර් 100කට වඩා අඩු මට්ටමක පවතින කිරි නිෂ්පාදන ඒකක රැසක් හඳුනාගෙන ඇති අතර එම ඒකකවල කිරි නිෂ්පාදනය වැඩි කිරීම මගින් ගොවි ජනතාවගේ දෛනික ආදායම ඉහළ නැංවීම මෙහි අරමුණ වේ.
කිරි ගොවියා වෙනුවට කිරි නිෂ්පාදන ව්‍යවසායකත්වයෙක් දක්වා කිරි ගොවියා නංවාලීම මගින් කිරි කර්මාන්තය සඳහා යොමු නොවන තරුණ ප්‍රජාව ආකර්ශණය සඳහා මෙම වැඩ පිළිවෙළ මගින් සිදුවිය යුතු බව මෙම අවස්ථාවට එක්වෙමින් කෘෂිකර්ම හා වැවිලි අමාත්‍යවරයා සඳහන් කළා.
-P.M
