ජනාධිපතිවරයා මේ බව සඳහන් කළේ ඉන්දීය සම්භවයක් සහිත දෙමළ ජනතාව මෙරටට පැමිණ වසර 200ක් සම්පූර්ණ වීම නිමිත්තෙන්, සුගතදාස ගෘහස්ථ ක්‍රීඩාංගණයේදී ඊයේ (02) පස්වරුවේ පැවැති වැවිලි ප්‍රජාව සඳහා වසර 200ක් සැපිරීමේ (නාම් 200) සැමරුම් උත්සවයට සහභාගි වෙමිනි.
එහිදී ජනාධිපතිවරයා අවධාරණය කර සිටියේ කුමන ජන කොටසක් නියෝජනය කළ ද සියලු ශ්‍රී ලාංකික පුරවැසියන්ගේ අයිතිවාසිකම් දිනා දීම වත්මන් රජයේ ප්‍රතිපත්තිය බවත් , සියලු දෙනා එක්කර ගනිමින් ශ්‍රී ලංකාව දියුණු රටක් ලෙස ගොඩනැඟීම තම අරමුණ බවත්, එම නිසා වතුකරයේ ජනතාව මුහුණ දෙන ගැටලු විසඳීම සඳහා පියවර ගන්නා බවත්ය .
මෙහි ප්‍රධාන ආරාධිත අමුත්තා ලෙස ඉන්දීය මුදල් ඇමැතිනි නිර්මලා සීතාරාමන් මහත්මිය සහභාගි වූ අතර කඳුකරයේ දමිළ ජනතාව 5000කට වැඩි පිරිසක් මීට එක්ව සිටියහ.
මෙම සැමරුම් උත්සවය සමඟ කඳුකර දමිළ ජනතාවගේ ජීවිතවල නව ගමනක් ඇරඹෙන බව පැවසූ ජනාධිපතිවරයා ඔවුන්ට ඉඩම් ඔප්පු ලබාදීම, අධ්‍යාපන අයිතිය තහවුරු කිරීම ඇතුළු වරප්‍රසාද දිනා දීමට ද රජය කැපවී සිටින බව වැඩිදුරටත් පැවසීය. කොටගල, මවුට්වර්නන් වතුයායේ දිඹුල පහළ කොටසේ ඉන්දීය ආධාර යටතේ ඉදි කිරීමට නියමිත නිවාස 10,000කින් යුත් ව්‍යාපෘතිය සඳහා මුල්ගල් තැබීමේ අවස්ථාවට ද මෙහිදී ජනාධිපති රනිල් වික්‍රමසිංහ මහතා සහ ඉන්දීය මුදල් ඇමැති නිර්මලා සීතාරාමන් මහත්මිය මාර්ගගත තාක්ෂණය ඔස්සේ එක්වූ අතර දමිළ සංස්කෘතිකාංග රැසකින් මෙම උත්සවය වර්ණවත් විය. හැටන් වෘත්තීය පුහුණු මධ්‍යස්ථානයේ ඉදි කරන ලද නව ශ්‍රවණාගාරය සහ පරිගණක ඒකකය විවෘත කිරීම ද මාර්ගගත තාක්ෂණය ඔස්සේ සිදු කෙරුණු අතර පාසල් සිසුන් වෙත පාසල් උපකරණ ප්‍රදානය කිරීම ද සංකේතවත්ව සිදුවිය.
-P.M
