අයවැය දෙවන වර කියවීමට අදාල ඡන්ද විමසීම එළැඹෙන 22 වනදා පැවැත්වෙන අතර තෙවනවර කියවීමට අදාල ඡන්ද විමසීම දෙසැම්බර් 08 වෙනුදා සිදු වේ. මෙම අවස්ථා දෙකේදීම ඇයවැය යෝජනාව පරාජය වුවහොත් ආණ්ඩුව විසුරුවා හැරියා සේ සලකන අතර නැවත මහ මැතිවරණයක් පවත්වා ජනතාව නව ආණ්ඩුවක් තෝරා පත් කර ගත යුතුය.
විපක්ෂ දේශපාලන පක්ෂ සියල්ලම පාහේ මහ මැතිවරණයක් ඉල්ලමින් දැන් මාස ගනනාවක් තිස්සේ උද්ඝෝෂණයක නිරත වෙයි. ඔවුන්ට අනුව රටේ ආර්ථික අර්බුදය විසැඳිය හැක්කේ මහ මැතිවරණයකින් පසුව එන ආණ්ඩුවට පමණි. මෙම පක්ෂ අතරින් සජබය, ශ්‍රීලනිපය සහ ජාජබය තමන්ට ආණ්ඩුවක් පිහි‍ටුවීමේ ජන වරම ලැබෙනු ඇතැයි දැඩි විශ්වාසයකින් පසුවේ.
කොහොම නමුත් වත්මන් දේශපාලන තත්වයන් අනුව මහ මැතිවරණයකදී ලැබිය හැකි ප්‍රතිපළය ගැන අනුමාන කළ හැක්කේ කිසිදු පක්ෂයකට බහුතර බලයක් නොලැබී යාමේ ඉඩ කඩ විශාල බවය. මහ මැතිවරණයකදී දැනට වෙන් වෙන්ව සිටින කොටස් ඒකාබද්ධව සන්ධාන ගත වීම සිදු විය හැකි නමුත් ප්‍රධාන කණ්ඩායම් හතරක් පහක් නිර්මාණය වීම සිදුවිය හැකිය. මෙහිදී බොහෝ විට එක්සත් ජාතික පක්ෂය ප්‍රමුඛ සන්ධාන්යක් පොදුජන පෙරමුණේ, ශ්‍රීලනිපයේ සහ සජබයේ නියෝජිතයන්ගෙන් බිහිවීම සිදු වෙනු ඇති බව දැනටම තොරතුරු වාර්ථා වී තිබේ. එය වඩාත් ශක්තිමත් සන්ධානයක් විය හැකි අතර පාර්ලිමේන්තුව තුල සැලකිය යුතු වැඩි පංගුවක් එය හිමිකර ගනුද ඇතැයි අනුමාන කළ හැකිය. සජබය සමඟ පක්ෂ කිහිපයක් සන්ධාන ගත වීමක් වෙනුද ඇත. ශ්‍රීලනීපයද වෙනම සන්ධාන්යකට එකතු වීම විය හැකිය. සෙසු සුළු පක්ෂ කොටස් මැතිවරණ ගිවිසුම් හරහා ඒ ඒ සන්ධාන සමඟ එකතුවීම විය හැකිය. ජවිපෙ ප්‍රමුඛ ජාජබයට තවත් පක්ෂවල පිරිස් එකතුවීමත් විය හැකි අතර එය වෙන්ම සන්ධානයක් ලෙස ඉදිරිපත් වෙනු ඇත. ඒ කෙසේ වෙතත් මේ විපක්ෂ සියලු දෙනා එක් සන්ධානයකට ගොනු වීම සිදු නොවනු ඇත. මන්ද නාමයෝජනා සැකසීමේ දී ඒ සියලු දෙනාට එක් පක්ෂයකින් නාම යෝජනා හා ජාතික ලැයිස්තු මන්ත්‍රීධුර ලබා දීමේ ප්‍රායෝගික හැකියාවක් නොපවතින නිසාය. ප්‍රධාන පක්ෂ වල ප්‍රදේශීය බලවතුන්ගේ බරපතල විරෝධයන් සන්ධානගතවීමට කැමැති අනෙක් පක්ෂ කෙරෙහි එල්ල වීමද අනිවාර්ය තත්වයකි.
කොහොම නමුත් විපක්ෂය බලාපොරොත්තු වන පරිදි අය වැය පරාජය කර අලුත් ස්ථාවර ආණ්ඩුවක් පිහි‍ටුවාගෙන රටේ අර්බුද විසඳිය හැකි නම් ඒ යහපත් දෙයකි. නමුත් කිසිදු පක්ෂයකට බහුතර බලයක් නොලැබී අස්ථාවර බවක් ඇති වුවහොත් රට යළි ගොඩ ගත නොහැකි ආගාධයකට කඩා වැටීමත් වැලැක්විය නොහැකි වෙනු ඇත. එමෙන්ම නැවත නැවත මැතිවරණ තබමින් ස්ථාවර ආණ්ඩුවක් පිහි‍ටුවා ගැනීමේ අවස්ථාවන් වුව ඇති විය හැකිය.
කෙසේ වුවත් අවසානයේ ජනතාවට සිදුවෙනු ඇත්තේ මේ විපක්ෂයේ දේශපාලන සූදුව සමඟ සෙල්ලම් කිරීමටය.
