අද (12) රජයේ ප්‍රවෘත්ති දෙපාර්තමේන්තුවේ පැවති මාධ්‍ය හමුවකට එක්වෙමින් මහ බැංකු අධිපතිවරයා ඒ බව සඳහන් කළේය.
එමෙන්ම මෙරට ආර්ථිකය බංකොලොත් වී ඇති බවට ඇතැමුන් සිදු කරන ප්‍රකාශවල සත්‍යතාවක් නොමැති බවත් මේ දිනවල රට පුරා දැඩි ආන්දෝලනාත්මක මාතෘකාවකට තුඩු දී ඇති ඩොලර් හිඟ වීම සහ විදේශ සංචිත අඩුවීම, රන් සංචිත අවම වීම හා ආර්ථික උද්ධමනයක් ඇතිවීමේ අවදානම සම්බන්ධයෙන් අදහස් දක්වමින් මහබැංකු අධිපතිවරයා ඒවා වෙන වෙනම ගෙන හැර දක්වමින් ඔහු කියා සිටියේ එවන් තත්ත්වයක් උද්ගතව නොමැති බවයි.
එහිදී වැඩිදුරටත් අදහස් දැක්වූ මහ බැංකු අධිපති අජිත් නිවාඩ් කබ්රාල් මහතා,
"මම හිතන්නේ අපිට මේ අවුරුද්ද තුළදී 5.5%ක පමණ ආර්ථික වර්ධන වේගයක් ළඟා කරගන්නට පුළුවන් වෙයි. එය පසුගිය වසරේ යම්කිසි අඩු ආර්ථික වර්ධනයක් තිබුණ්‍ර නිසා ඒක ජයක් හැටියට සැලකුවේ නැතත් 5.5% වර්ධන වේගයක් අපිට ඇති කරගන්න පුළුවන්නම් ඒක සාර්ථක එකක් හැටියට තමයි මම දකින්නේ. ඒක කරන ගමන්ම අපිට තවත් අභියෝග කිහිපයක් තිබෙනවා ජයගන්නට. අපි හැමෝම දන්නවා ආර්ථිකයක් හසුරවද්දි සියලුම අංගයන් එකට වර්ධනයවීමක් ඇති කරගන්නට අවශ්‍යයි. එහෙම කරගෙන යන අතරම තමයි මේ කටයුත්තට අපි යෙදෙන්නේ. මම හිතන්නේ ඒක අපිට ළඟා කරගන්න පුළුවන් වෙයි. ඒ සඳහා සියලුදෙනාම එකතුවෙලා එකට වැඩකරන්න ඕනේ. විවිධ පැතිවලින් එන විවිධ අභියෝග තවදුරටත් වැඩිකරන්නේ නැතුව ඒක කෙරුවනම් හොඳයි එක තමයි මගේ අදහස."
