එමෙන්ම මේ සහන මල්ල පළාත් සභා මැතිවරණය ඉලක්ක කරගෙන දුන්නක බවට පළ වන පුවත් ගැන සඳහන් කළ ඇමැතිවරයා පළාත් සභා මැතිවරණය පැවැත්වීම ගැන කිසිදු සාකච්ඡාවක් හෝ සිදුව නැති බව අවධාරණය කරන ලදී.. රට මුහුණ දෙමින් තිබෙන විදේශ විනිමය අර්බුධය සහ ජාත්‍යන්තර වශයෙන් ඇතිව තිබෙන භාණ්ඩ හිඟය නිසා මෙරට භාණ්ඩ සුලබ කිරීමේ හැකියාව රජය සතුව නොමැති වීම නිසා භාණ්ඩ මිළ ඉහළ යෑම හේතුවෙන් පීඩාවට පත් වන ජනතාවට ඊට විකල්පයක් ලෙස මෙලෙස සහන මල්ලක් ලබා දීම සිදු කළ බව පැහැදිලි කරන ලදී.
මේ අතර මුදල් අමාත්‍ය බැසිල් රාජපක්ෂ හඳුන්වා දුන් සහන පැකේජය තුළින් රට මුහුණ දී ඇති ඩොලර් අර්බුදයට විසඳුමක් නොලැබෙන බව පාර්ලිමේන්තු මන්ත්‍රී ආචාර්ය හර්ෂ ද සිල්වා පවසයි.
තුන්වේල කා ජීවත් වීමට නොහැකි ජනතාවට තාවකාලික සහනයක් ලැබුණත් මෙම සහන පැකේජය හේතුවෙන් රට තුළ අති උද්ධමනයක් ඇති විය හැකි බවත් හර්ෂ ද සිල්වා මහතා කීවේය.
රජයේ සංඛ්‍යාලේඛන අනුව රට තුළ උද්ධමනය 12.1කින් සහ ආහාර උද්ධමනය සියයට 22 කින් වැඩිවී ඇති අවස්ථාවක රජය මෙම තීරණය ගැනීම විනාශයක මුල බවත් මන්ත්‍රීවරයා ප්‍රකාශ කළේය.
