මෙසේ ලාභ ලැබීම නිසා සේවක සේවිකාවන්ට හා ගොවීන්ට ලාභාංශ බෙදාදීිමට හැකිවු බව රාජ්‍ය අමාත්‍ය ජානක වක්කුඹුර පවසයි. මේ වසරේදී උක් මෙට්‍රික්ටොන් ලක්‍ෂ 3ක් ඇඹරීමට හැකීවී තිබේ.
නිෂ්පාදනය කළ එතනෝල් ප්‍රමාණය ලීටර් මිලියන 5කි. සමාගම සියයට 50 ක් ලාභ ලබන්නේ එතනෝල් නිෂ්පාදනයෙනි. ලැබු ලාභයෙන් සේවකයන්ට දීමනා ලබාදීමට අමතරව වසර 5ක් සේවය කළ අය ස්ථීර කිරිීමද පසුගියදා සිදුවිය. ලංකා සීනි සමාගම අයත් සෙවණගල ඒකකයේ අනියම් සේවක සේවිකාවන් 400 දෙනෙකුට ස්ථිර පත්වීම් ප්‍රදානය කිරීමද පසුගියදා සිදුකෙරිණි.
මේ අතර වහාම ක්‍රියාත්මක වන පරිදි උක් මෙට්‍රික් ටොන් එකකට ලබා දෙන මුදල රුපියල් 500කින් වැඩි කෙරෙන බව කුඩා වැවිලි භෝග වගා සංවර්ධනය, ආශ්‍රිත කර්මාන්ත හා අපනයන ප්‍රවර්ධන රාජ්‍ය ඇමැති ජානක වක්කුඹුර පවසයි.
පැල්වත්ත සහ සෙවණගල සීනි සමාගම්වල සේවකයන්ට දෙවැනි වතාවටත් දිරිදීමනා ලබාදීමේ අවස්ථාවට එක්වෙමින් ඇමැතිවරයා මේ බව සඳහන් කර තිබිණි. "ජනවාරි පළමුවැනිදා ඉඳලා උක් මෙට්‍රික් ටොන් එකක් සඳහා ලබා දෙන මුදල රුපියල් 500 කින් ඉහළ නැංවෙනවා.පහුගිය කාලේ උක් මෙට්ට්‍රික් ටොන් එකකට දුන්නේ රුපියල් 5000යි. ඒ මුදල රුපියල් 6250 ක් දක්වා ඉහළ නංවන්න රජය මේ වෙනකොට පියවර අරන් තියෙනවා.”
ලංකා සීනි සමාගම පෞද්ගලික අංශයට විකුණා දැමීමට අවස්ථා ගණනකදී උත්සාහ කළ ආයතනයකි. පසුගිය කාලයේ එම ආයතනය පවත්වාගෙන ගියේ ඉතා අසීරුවෙනි. සේවක පඩි නඩි ගෙවීම අසීරු වූ අතර ප්‍රසාද දීමනාද කපා හැර තිබිණි. එය පවත්වාගෙන ගියේ මිලියන 500ක බැංකු අයිරාවකිනි.
සෙවණගල සීනි කර්මාන්ත ශාලාව රජයේ හිමිකාරිත්වයෙන් ඉවත් කර පෞද්ගලික අයිතියට පැවරීමට 2019 වසරේදී පැවැති රජය විසින් උත්සහ ගන්නා ලදී. එහෙත් ඊ්ට විරෝධය පල කරමින් සෙවණගල සීනි කර්මාන්ත ශාලාවේ සේවකයින් හා උක් ගොවීන් විරෝධය පළකිරීම නිසා ඒ වැලැකිනි.
2019 වසරේ මිලියන 1400ක අලාබයක් ලද එම සමාගම මෙතරම් ලාබයක් උපයා ඇත්තේ එහි ඉතිහාසයේ පළමු වරටය.දේශීය නිශ්පාදන කාර්මාන්ත ගොඩනැංවීම වෙනුවෙන් දැඩිව කටයුතු කරන වත්මන් පාලනය යටතේ නව පාලනාධිකාරියක් පත්කර නිෂ්පාදනය ආරම්භ කෙරැණු අතර සේවකයන්ටද, උක් ගොවීන්ටද ආර්ථික ප්‍රතිලාභ සලසමින් මාස කිහිපයක කාලයක් තුළ ලාබ ලබන තත්ත්වයට පත්විය.
