මහවැලි ජල සුරක්ෂිතතා සංවර්ධන වැඩසටහන වාරි හා පානීය ජලය සම්බන්ධ ප්‍රධානතම ආයෝජනයක් වනවා. ඇමරිකා ඩොලර් මිලියන 966 ක් ඒ සඳහා වැය කිරීම අපේක්ෂාවයි. මෙම ව්‍යාපෘතිය යටතේ උතුරු , උතුරු මැද , වයඹ හා මධ්‍යම පළාත්වල උග්‍ර පානීය හා වාරි ජල අවශ්‍යතා සපුරාලීම අරමුණයි. ඒ සඳහා උතුරු මැද මහ ඇල , වයඹ මහ ඇල , මිනිපේ මහ ඇල , මීගහකිරුල සහ මහ කිතුල යන ගබඩා ජලාශ පද්ධති ඉදි කිරීමේ කටයුතු දැනටමත් ආරම්භ කර තිබෙනවා. ඉදි කෙරෙමින් පවතින උතුරු මැද පළාත් මහ ඇල අදියර 1 සහ 2 මගින් මොරගහකන්ද හා කළු ගග ජලාශවල ගබඩා කෙරෙන අතිරික්ත ජලය උතුරු හා උතුරු මැද පළාත්වල ජල අවශ්‍යතා සපුරාලීම අරමුණයි. ඒ අනුව වගා ඉඩම් හෙක්ටයාර 73800 කට දියවර සැපයීම මෙන්ම පවුල් දෙලක්ෂ පනස් දහසකට පානීය ජලය සැපයීම අපේක්ෂාවයි. වසර හයකින් නිම කිරීමට සැලසුම් කර තිබූ මෙම ව්‍යාපෘතිය වසර හතරකින් එනම් 2025 වනවිට අවසන් කිරීම සඳහා අදාළ කොන්ත්‍රාත්තුව සංශෝධනය කිරීමට ද කැබිනට් අනුමැතිය හිමි වුණා.
මේ අතර නව ඖෂධ කම්හල් තුනක් කඩිනමින් ඇරඹීමටත් කැබිනට් අනුමැතිය හිමිවුණා. හොරණ මිල්ලෑව ප්‍රදේශයේ පිහිටුවීමට නියමිත ඖෂධ කලාපය එස් පි එම් සි ලෝටස් ඖෂධ ව්‍යාපෘතිය ලෙස නම් කිරීමට රජය තීරණය කර තිබෙනවා.ඒ අනුව පිළිකා නාශක ඇතුලු ඖෂධ නිපදවීම සඳහා කම්හල්තුනක් කඩිනමින් පිහිටුවීමට ද අමාත්‍ය මණ්ඩල අනුමැතිය හිමි වුණා.
මේ අතර පූර්ණ රාජ්‍ය සමාගමක් වන ශ්‍රී ලංකා ඉන්සිටිටියුට් ඔෆ් බයෝ ටෙක්නොලොජි ප්‍රයිවට් ලිමිටඩ් ආයතනය මගින්විද්‍යා හා තාක්ෂණ නවෝත්පාදන උද්‍යානයක් ඉදි කිරීමට සැලසුම් කර තිබෙනවා. ඒ සදහා පිටිපන මහ හේන වත්ත ප්‍රදේශයේ අක්කර 13 ක භූමි භාගයක් ලබාදීමට කැබිනට් අනුමැතිය හිමි වුණා.
මොරටුව විශ්වවිද්‍යාලය සඳහා වෛද්‍ය පීඨයක් ඉදි කිරීම රජයේ අරමුණයි. මෙම ව්‍යාපෘතියට කුවෙට් ඩිනාර් මිලියන 10 ක්ලබා ගැනීමට අදාළ ගිවිසුමට එළඹීමට කැබිනට් අනුමැතිය හිමි වුණා.
බහාලුම්ගත භාණ්ඩ පරීක්ෂා කිරීමේ මධ්‍යස්ථානයක් කෙරවලපිටිය අන්තර් හුවමාරුව ආසන්නයේ ඉදිකිරීමට අදාළ ඉඩම් පවරා ගැනීමට ද අමාත්‍ය මණ්ඩල අනුමැතිය හිමි වුණා.
-පංචාලි අබේසේකර
