රට විවෘත කළත් රජයේ සහ පෞද්ගලික ආයතනවලට සේවකයන් කැදවීම 25% සීමාවේද පොදු ප්‍රවාහන සේවා වල මගින් රැගෙන යාම 50% සීමාවේ ද තවදුරටත් පවත්වාගෙන යායුතු බව ඔහු අවධාරණය කරනවා. දැඩි සංචරන සීමා ඉවත් කළ හැක්කේ එන්නත්කරණයය සියයට 70-80 සීමාවට ළඟා වූ විට බවද ඔහු වැඩිදුරත් පවසනවා.
මේ අතර දැනට ක්‍රියාත්මක නිරෝධායන ඇඳිරිනීතිය ඉවත් කිරීමත් සමග රට යළි විවෘත කිරීමේ දී පැනවිය යුතු සෞඛ්‍ය නිර්දේශ හා සීමාවන් පිළිබඳව පූර්ණ සැලැස්මක් සකස් කිරීමට කොවිඩ් මර්දන විශේෂ කමිටුව තීරණය කර තිබේ.
අද (24) පෙරවරුවේ මුදල් අමාත්‍ය බැසිල් රාජපක්ෂ මහතාගේ ප්‍රධානත්වයෙන් කොවිඩ් මර්දන විශේෂ කමිටු රැස්වීම වීඩියෝ තාක්ෂණය ඔස්සේ පැවැත්වුණි.
එහිදී මේ සම්බන්ධයෙන් තීරණයන් රැසක් ගෙන තිබේන බව වාර්තා වේ.
ඒ අනුව ක්ෂේත්‍ර 03ක් යටතේ මෙම සැලැස්ම සකස් කෙරෙන අතර රාජ්‍ය අංශයේ යාන්ත්‍රණය ක්‍රියාත්මක කිරීම සඳහා රාජ්‍ය පරිපාලන අමාත්‍යාංශය, පොදු ප්‍රවාහන සේවා සඳහා ප්‍රවාහන අමාත්‍යාංශය සහ පෞද්ගලික අංශයේ සේවාවන් පවත්වාගෙන යායුතු ආකාරය පිළිබඳව කම්කරු අමාත්‍යාංශය විසින් සෞඛ්‍ය විශේෂඥ කමිටු හා සෞඛ්‍ය අමාත්‍යාංශයේ මගපෙන්වීම යටතේ නිර්දේශ නිකුත් කරනු ඇත.
මේ අතර සංචරණ සීමා ඉවත් කිරීමෙන් පසු අන්තර් පළාත් පෞද්ගලික බස් රථ ධාවනයට එක් කිරීමට හැකි පරිදි ඔවුන්ට රුපියල් ලක්ෂ දෙකක සහනාධාරයක් ලබාදෙන බව රාජ්‍ය අමාත්‍ය දිලුම් අමුණුගම මහතා පවසනවා. ඒ සම්බන්ධයෙන් අදාළ බස් රථ සංගම් සමග සාකච්ඡා කර එකගතාවකට පැමිණි බවයි රාජ්‍ය අමාත්‍යවරයා සදහන් කළේ.
ඒ අනුව රට විවෘත කිරීමෙන් පසු පොදු ප්‍රවාහන සේවාව ක්‍රියාත්මක කළ යුත්තේ කෙසේද යන්න පිළිබඳ තීරණය ලබන සතියේ දී දැනුම් දෙන බව දිලුම් අමුණුගම මහතා ප්‍රකාශ කර තිබේ.
රාජ්‍ය අමාත්‍ය දිලුම් අමුණුගම මහතා මේ බව සදහන් කළේ මහනුවර පැවති උත්සවයකින් අනතුරුව මාධ්‍ය හමුවේ අදහස් දක්වමිනුයි.
-පංචාලි අබේසේකර
