මෙම එන්නතේ සාමාන්‍ය මිල රුපියල් ලක්ෂයක් පමණ වෙයි. දෙමටගොඩ ප්‍රදේශයේ ඔසුසලක හිමිකරුවන්ගෙන් මෙම එන්නත ලබාගෙන ඇත්තේ වෛද්‍යවරයකුගේ නිර්දේශය මතය. මෙම රෝගියා ජපානයේ සිට මෙරටට පැමිණි පුද්ගලයෙකි.
කෙසේ වෙතත් සෞඛ්‍ය අමාත්‍යාංශය ප්‍රකාශ කරන්නේ මෙම එන්නත වෛද්‍ය සැපයීම් අංශයේ හෝ පෞද්ගලික රෝහල්වල නොමැති බවයි. ශ්‍රී ලංකාවට මෙම එන්නත ආනයනය කරනු ලබන්නේ පෞද්ගලික සමාගමක් විසිනි. ඒ කෝටා ක්‍රමයකටය.
එම සමාගම ඖෂධ සැපයීම, නිෂ්පාදනය පිළිබඳ රාජ්‍ය අමාත්‍යාංශයට දැනුම් දී ඇත්තේ ඉදිරි දෙසතිය ඇතුළතදී එන්නත් 600ක් මෙරටට ලැබීමට නියමිත බවයි.
මෙම එන්නත වෙනත් රටවලින් ලබාගැනීම සඳහා රාජ්‍ය ඖෂධ නීතිගත සංස්ථාව විදේශ කටයුතු අමාත්‍යාංශය මගින් කළ උත්සාහයක්ද ව්‍යාර්ථ වී තිබේ. ‘ටොසිලිසුමාබ්’ එන්නත කොවිඩ් නිව්මෝනියා මෙන්ම අසාධ්‍ය තත්ත්වයේ පසුවන රෝගීන්ට ලබාදෙයි.
