අග්‍රාමාත්‍යවරයා මේ බව සදහන් කර ඇත්තේ වන අලි- මිනිස් ගැටුම් පාලනය කිරීම සඳහා දීප ව්‍යාප්ත අලිවැට ඉදි කිරීම පිළිබඳ සාකච්ඡාවට එක්වෙමින් අරලියගහ මන්දිරයේ දී ය.
වනජීවි සංරක්ෂණ දෙපාර්තමේන්තුවට සහ සිවිල් ආරක්ෂක දෙපාර්තමේන්තුවට පමණක් මෙහි සමස්ත වගකීම නොපැවරෙන පරිදි අදාළ ප්‍රාදේශීය ලේකම් කාර්යාල, ගොවිජන සේවා දෙපාර්තමේන්තුව, මහවැලි අධිකාරිය සහ ග්‍රාම නිලධාරින් ඇතුළු රාජ්‍ය ආයතන, නිලධාරීන් සහ ග්‍රාමීය ප්‍රජා සංවිධාන ඇතුළත් ස්වේච්ඡා බලකායක් මගින් මෙම වන අලි - මිනිස් ගැටුම් පාලනයට කළ හැකි බව මෙහි දී අග්‍රාමාත්‍යවරයා පෙන්වා දී ඇත.
2021 වර්ෂයේ වනජීවි සංරක්ෂණ දෙපාර්තමේන්තුවේ ජාතික වැඩසටහනක් ලෙස විදුලි වැට කිලෝමීටර 1500ක ප්‍රමාණයක් දීප ව්‍යාප්ත ලෙස ඉදිකිරීමට සැලසුම් කර තිබේ. මේ වන විට ඊට අදාළ අමුද්‍රව්‍ය සඳහා ප්‍රසම්පාදන කටයුතු අවසන්ව ඇති අතර දිස්ත්‍රික්ක 19ක් ආවරණය කරමින් ත්‍රිවිධ හමුදාව, සිවිල් ආරක්ෂක දෙපාර්තමේන්තුව, ප්‍රාදේශීය වනජීවි කාර්යාල හා ප්‍රාදේශිය ලේකම් කාර්යාල අලි වැට ඉදිකිරීම සඳහා දායකත්වය සපයයි.
දැනට ඉදිකර තිබෙන කිලෝමීටර 4500ක් පමණ වන අලිවැට නඩත්තු කටයුතු සඳහා සිවිල් ආරක්ෂක දෙපාර්තමේන්තුවේ භටයන් 3900ක් යොදා ඇති අතර ඊට බහු කාර්ය සංවර්ධන දෙපාර්තමේන්තුවේ 1500ක පිරිසක් අනුයුක්ත කර ඇති බව වනජීවි සංරක්ෂණ දෙපාර්තමේන්තුව එහිදී හෙළි විය.
-පංචාලි අබේසේකර
