රජය මගින් ක්‍රියාත්මක කර ඇති පොහොර සහනාධාරය යටතේ ලබාදී ඇති පොහොර තොග වැඩිමිලට අලෙවි කරන්නන් පිලිබද ගොවි ජනතාවගෙන් ලැබුණ පැමිණිලි මත එවැනි පුද්ගලයින් නීතියේ රැහැනට කොටු කර ගැනීමේ මෙහෙයුම් ආරම්භ කෙරුණා. එය තවදුරටත් ක්‍රියාත්මක බවයි පාරිභෝගික අධිකාරිය පවසන්නේ. රුපියල් 1500 ක මිලකට අලෙවි කළ යුතු කිලේග්‍රෑම් 50ක පොහොර ඇසුරුමක් රුපියල් 2500 බැගින් අලෙවි කරමින් තිබූ වෙළෙදසැල් දෙකක් වැටලීමට පාරිභෝගික අධිකාරියේ මාතර කාර්යාල නිලධාරීන් සමත් වුණා. දෙනිපිටිය හා කඹුරුපිටිය ප්‍රදේශවල සිදු කළ වැටලීම් වලදී සොයාගත් පොහොර තොග නියමිත මිලට ගොවීන්ට ලබාදීමටයි කටයුතු කෙරුනේ. වෙළෙදසැල් හිමියන්ට එරෙහිව නඩු පැවරීමට පාරිභෝගික අධිකාරියේ නිලධාරීන් කටයුතු කළා.
මේ අතර නුවරඑලිය දිස්ත්‍රික්කයේ පොහොර වංචනිකයින් තරාතිරම නොබලා අත්අඩංගුවට ගන්නා ලෙස අමාත්‍ය සී.බී රත්නායක මහතා අදාල අංශවලට දැනුම් දී තිබෙනවා. මෙම දිස්ත්‍රික්කයේ ගොවීන් සදහා ලබාදීමට පොහොර මෙට්‍රික් ටොන් 4600 ක් නිකුත් කර ඇති අතර ඇතැම් පුද්ගලියන් ව්‍යාජ තොරතුරු ඉදිරිපත් කර පොහොර ලබාගෙන වැඩි මිලට එම පොහොර විකුණනට බවට තොරතුරු හෙලිවීමත් සමගයි අමාත්‍යරයා ගොවිජන සේවා සහකාර කොමසාරිස්වරියට මෙන්ම නුවරඑළිය නියෝජ්‍ය පොලිස්පතිවරයාට හා පාරිභෝගික අධිකාරියට මෙසේ උපදෙස් ලබා දී තිබෙන්නේ.
-පංචාලි අබේසේකර
