අරලියගහ මන්දිරයේ පැවති සාකච්ඡාවකට එක්වෙමින් අග්‍රාමාත්‍යවරයා මේබව ප්‍රකාශ කර ඇත.
මේ අතර රුපියල් 5,000 දීමනාව නෞකා අනතුර හේතුවෙන් අගතියටපත් ධීවර ප්‍රජාව සඳහා ද ලබන සඳුදා සිට ලබා දෙන බව අග්‍රාමාත්‍යවරයා මෙහිදී ප්‍රකාශ කර ඇත.
පරිසර, ධීවර, ආර්ථික ඇතුළු සියලු ක්ෂේත්‍ර කෙරෙහි අවධානය යොමු කරමින් අදාළ නෞකාව ගිනිගැනීමෙන් ඇතිවූ හානියට වන්දි තක්සේරු කිරීමට හා අදාළ නෞකා සමාගමෙන් හානි පූර්ණ වන්දි ලබා ගැනීමට අවශ්‍ය නෛතික පියවර ගන්නා ලෙසත් නිලධාරීන්ට උපදෙස් ලබාදී තිබේ. එසේම එම ස්ථානයෙන් නෞකාව ඉවත් කිරීම සම්බන්ධයෙන් ද අග්‍රාමාත්‍යවරයා මෙහිදී පෙන්වා දී ඇත.
මේ අතර මුහුදුබත් වෙමින් ඇති එක්ස්ප්‍රස් පර්ල් නෞකාවේ තෙල් කාන්දුවක් සිදුවනවා ද යන්න සොයා බැලීමට අපරාධ පරීක්ෂණ දෙපාර්තමේන්තුවේ කණ්ඩායමක් අද(12) ඒ ආශ්‍රිත මුහුදු ප්‍රදේශයට යාමට නියමිත බව පොලිසිය පවසයි.
අදාළ කණ්ඩායම විසින් එම ස්ථානය නිරීක්ෂණය කිරීමෙන් අනතුරුව ජල සාම්පල ලබා ගැනීමට නියමිත අතර ලබා ගන්නා ජල සාම්පල ඉදිරි විමර්ශන සඳහා රජයේ රස පරීක්ෂකවරයා වෙත යොමු කිරීමට පියවර ගන්නා බව පොලිසිය පවසයි.
මේ අතර ගිනි ගැනීමට ලක්වූ එක්ස්ප්‍රස් පර්ල් නෞකාවේ අපද්‍රව්‍ය හේතුවෙන් සංචාරක කර්මාන්තයට බලපෑම් ඇති වන බව සංචාරක සංවර්ධන අධිකාරිය පවසයි.
සංචාරක කලාප 15 න් 8 ක්ම පිහිටා තිබෙන්නේ නෞකාව ගිනි ගැනීම හේතුවෙන් බලපෑමට ලක්වන කලාපය තුළ බව සංචාරක සංවර්ධන අධිකාරියේ අධ්‍යක්ෂ ජනරාල් ධම්මිකා විජේසිංහ මහත්මිය පවසයි.
අපගේ සංචාරක කටයුතු බොහෝමයක් සිදුවන්නේ මුහුදු වෙරළ පරිසරය, ජෛව විවිධත්වය ආශ්‍රිතව වන බැවින් සහ විදේශිකයින් අතර බොහෝ ජනප්‍රිය මුහුද ආශ්‍රිත ආහාරවන ඉස්සෝ, දැල්ලෝ, කකුළුවන් පිළිබ ද යම් ගැටලු ඇතිවිය හැකි බව එතුමිය සඳහන් කරයි.
ගිනි ගැනීමට ලක්වූ නැවෙන් මත්ස්‍ය සහ මුහුද ආශ්‍රිත ආහාරවලට කොතරම් බලපෑමක් සිදුව ඇද්ද යන්න පිළිබඳව මේ වනවිට නිශ්චිතව සඳහන් කළ නොහැකි බව ද එතුමිය වැඩිදුරටත් සඳහන් කර තිබෙනවා.
-පංචාලි අබේසේකර
