2016 වසරේ මාර්තු මස 31 වනදා ශ්‍රී ලංකා මහ බැංකුව විසින් සිදුකළ බැඳුම්කර වෙන්දේසියේදී රුපියල් බිලියන 15ක් වටිනා බැඳුම්කර සම්බන්ධයෙන් සාවද්‍ය පරිහරණය සිදුකළේ යැයි චෝදනා කරමින් හිටපු මුදල් අමාත්‍ය රවි කරුණානායක ඇතුළු විත්තිකරුවන්ට එරෙහිව ගොනුකර තිබෙන නඩුවට අදාළව එම තීරණය දී තිබේ.
අමල් රණරාජා, නාමල් බළල්ලේ සහ ආදිත්‍ය පටබැඳිගේ යන මහත්වරුන්ගෙන් සමන්විත කොළඹ ත්‍රිපුද්ගල මහාධිකරණ විනිසුරු මඩුල්ල ඉදිරියේ එම නඩුව අද කැඳවනු ලැබීය.
එහිදී පැමිණිල්ල වෙනුවෙන් පෙනී සිටි ජ්‍යෙෂ්ඨ රජයේ නීතිඥ ලක්මිණි ගිරිහාගම මෙනෙවිය අධිකරණය හමුවේ ඉල්ලීමක් කරමින් එම නඩුවේ, තුන්වන විත්තිකරු වශයෙන් නම් කර සිටින අර්ජුන් මහේන්ද්‍රන් සහ නව වන විත්තිකරු වශයෙන් නම් කර සිටින අජහාන් ගාර්දිය පුංචිහේවා යන අය මේ වන විට අධිකරණය මඟ හැර විදේශගතව සිටින හෙයින් අපරාධ නඩු විධාන සංග්‍රහයේ 458 වන වගන්තිය යටතේ ඔවුන් නොමැතිව නඩු විභාගය පවත්වාගෙන යාම සඳහා වන ඉල්ලීමට අදාළව සාක්ෂි මෙහෙය වීමට අවසර දෙන්නැයි ඉල්ලා සිටියේය.
ඉන් අනතුරුව අධිකරණයේ අවසරය මත පැමිණිල්ල වෙනුවෙන් පෙනී සිටින ජ්‍යෙෂ්ඨ රජයේ නීතිඥවරියගේ මෙහෙයවීමෙන් සාක්ෂි සටහන් කර ගැනීම සිදුකෙරුණි.
