2016 වසරේදී රාජගිරිය ප්‍රදේශයේදී අපරික්ෂාකාරී ලෙස රිය පදවා තරුණයකුට බරපතළ තුවාල සිදු කළේ යැයි ඔහුට චෝදනා එල්ල වී තිබේ. එම නඩුව අද කොළඹ මහාධිකරණ විනිසුරු නාමල් බලල්ලේ ඉදිරියේ කැඳවනු ලැබීය.
මෙම රිය අනතුර සිදුකර පලායෑම, අනතුර සම්බන්ධ තොරතුරු වසං කිරීම ඇතුලු චෝදනා කිහිපයක් පාඨලී චම්පික රණවකට එරෙහිව එල්ල වී ඇත. මෙම රිය අනතුර චම්පික රණවක විසින් සිදු කළ බවට පැහැදිලි සාක්ෂි තිබෙන බව නීතිපතිවරයා විසින් මීට පෙර අධිකරණයට කරුණු දක්වා තිබිණි. එහෙත් මෙම අනතුර සිදු වූ මොහොතේදී රථය පැදවූ හිටපු ඇමැතිවරයා වෙනුවට ඔහුගේ රියැදුරෙකු වන දිලුම් තුසිත කුමාර ඉදිරිපත්කර තිබූ අතර එවකට වැලිකඩ පොලීසියේ ස්ථානාධිපතිවරයා ලෙස කටයුතු කළ නිලධාරියා අදාල පොලිස් සටහන්වල මෙම රථයේ රියැදුරා ලෙස පසුව ඉදිරිපත් කෙරුණු තැනැත්තාගේ නම සටහන් කරන ලෙස පොලිස් රථවාහන අංශයේ නිලධාරීන්ට බලපෙෑම් කර තිබූ බවත් හෙළි වී ඇත. එසේම එවකට කොළඹ ප්‍රදේශය භාරව සිටි නියෝජ්‍ය පොලිස්පතිවරයා ලෙස කටයුතු කළ පූජිත් ජයසුන්දර ද සත්‍ය තොරතුරු වසන් කිරීමට සහය වී ඇති බවත් නීතිපති දෙපාර්තමේන්තුව අධිකරණයට කරුණු වාර්ථා කර ඇත.
මෙම සිද්ධිය එලෙස යටපත් කිරීමට චම්පික රණවක, පොලිසිය සමඟ කුමන්ත්‍රණකාරී ලෙස කටයුතු කළ බව මේ වන විට පැහැදිලි තත්වයයි. එසේ නමුත් මෙම රිය අනතුරෙන් බරපතල තුවාල ලැබූ සංදීප් සම්පත් තරුණයා වෙනුවෙන් කිසිදු සොයා බැලීමක් හෝ නොකළ බවටද චම්පික රණවකට චෝදනා එල්ල වෙයි. මේ වන විට ඔහු ස්ථිර ආබාධිතයකු බවට පත්ව සිටී.
අද මෙම නඩුව කැඳවූ අවස්ථාවේදී විත්තිකාර චම්පික රණවක වෙනුවෙන් පෙනී සිටි නීතිඥ රජික කොඩිතුවක්කු අධිකරණයට දන්වා සිටියේ එම නඩුවේ විත්තිය වෙනුවෙන් පෙනී සිටින ජනාධිපති නීතිඥ අනුජ ප්‍රේමරත්නගේ කණිෂ්ඨ නීතිඥවරයෙකු සහ නීතිඥවරියක් කොවිඩ් ආසාදනය වී සිටින හෙයින් ජනාධිපති නීතිඥ ප්‍රේමරත්න ද මේ වනවිට නිරෝධායනයට ලක්වී සිටින බවය.
මේ නිසා මෙම නඩුවට අදාළ මූලික විරෝධතා ඉදිරිපත් කිරීම සඳහා දිනයක් අයැද සිටින ලෙස ලෙස ජනාධිපති නීතිඥ අනුජ ප්‍රේමරත්න තමන්ට දන්වා ඇතැයිද නීතිඥවරයා පැවසීය.
මෙහිදී පැමිණිල්ල වෙනුවෙන් පෙනී සිටි නියෝජ්‍ය සොලිසිටර් ජනරාල් දිලීප පිරිස් අධිකරණයට දන්වා සිටියේ කොවිඩ් තත්වය පදනම් කර ගනිමින් මූලික විරෝධතා දේශනය පැවැත්වීමට තවදුරටත් කල්ගත වන නිසා අධිකරණයේ කාලය ඉතිරිකර ගැනීමට මෙම නඩුවට අදාළ විත්තියේ මූලික විරෝධතා ලිඛිතව ඉදිරිපත් කිරීම සුදුසු බවය.
මෙහිදී විනිසුරු බලල්ලේ ද කියා සිටියේ විත්තියේ මූලික විරෝධතා ලිඛිතව ඉදිරිපත් කිරීම සුදුසු බවය.
