මෙරටට පැමිණෙන චීන ආරක්ෂක ඇමැතිවරයා ජනාධිපති ගෝඨාභය රාජපක්ෂ මහතා ප්‍රමුඛ රජයේ ඉහළ පෙළේ නායකයින් සමඟ සාකච්ඡා කිරීමට නියමිතව තිබෙන අතර කලාපයේ ආරක්ෂක සහයෝගිතාව තවදුරටත් ඉහළ නංවා ගැනීම සම්බන්ධයෙන් එහිදී වැඩි අවධානයක් යොමු කරන බව රජයේ ප්‍රවෘත්ති දෙපාර්තමේන්තුව පවසයි. ඒ අනුව එළඹෙන 29 දා තෙක් මෙරට රැදී සිටින චීන ආරක්ෂක ඇමැති ජෙනරාල් වෙයි ෆෙන්ග්හි මහතා පවතින කොවිඩ් 19 වසංගත තත්ත්වය තුළ සෞඛ්‍ය අංශ නිකුත් කර තිබෙන නිර්දේශ අනුව සිය සංචාරය සිදු කිරීමට ද නියමිතව තිබේ.
මෙය වත්මන් ආණ්ඩුව බලයට පත් වීමෙන් පසු චීන රජයේ ඉහළම නියෝජිතයකු මෙරට සිදු කරන දෙවන ඉහළම මට්ටමේ සංචාරය වන අතර පසුගිය වසරේ ඔක්තෝබර් මාසයේ චීන රජයේ ඉහළම විදේශ ප්‍රතිපත්ති තීරකයකු වන යැන්ග් ජිචි මෙරට සංචාරය කළේය.
කෙසේ නමුත් චීනයේ ඉහළම රාජ්‍යතාන්ත්‍රික මැදිහත්වීම ශ්‍රී ලංකාව කෙරෙහි සිදුවෙමින් පැවැතීම ගැන ලෝකයේ ප්‍රබල රටවල් ඒ සම්බන්ධයෙන් දැඩි අවධනය යොමුකර තිබේ. විශේෂයෙන්ම මේ වන විට චීනය ඉන්දියානු සාගර කලාපය තුල සිදු කරමින් සිටින දේශපාලනික මැදිහත්වීම නිසා ඇමැරිකාව ප්‍රමුඛ රාජ්‍ය කඳවුර ඉන්දියානු සාගර කලාපයේ සිය බලය පතුරුවා ගැනීම ගැන බරපතල අර්බුධයකට ලක්ව සිටී. චිනය සිය භු දේශපාලනික බලය වෙනුවෙන් ක්‍රියත්මකකර තිබෙන වැඩ පිළිවෙලෙහි මෙම කලාපය තුළ වැදගත්ම කෙන්ද්‍රස්ථානය වී ඇත්තේ ශ්‍රී ලංකාවය. කොළඹ වාරාය නගරය එහි සංධිස්ථානයක් වන අතර මේ වන විට කොළඹ වරාය නගර ආර්ථික කොමිසම් සභා පනත් කෙටුම්ත සම්බන්ධයෙන්ද ආන්දෝලනාත්මක තත්වයක් ඇති කර තිබේ. එම පනත හරහා වරාය නගරය චිනයේ පාලනයට මුළුමනින්ම යටත්වන ප්‍රදේශයක් ලෙස තහවුරු වන බව නීති හා දේශපාලනික ක්ෂේත්‍රයේ අදහස වී ඇත.
