මේ වන විට 37වන වියේ පසුවන මහේල ඉන්දියාවට එරෙහිව 1997 වසරේදී සිය ටෙස්ට් දිවිය ආරම්භ කළේය. ඔහු සිය මංගල තරගයේදීම ලකුණු 66ක් රැස්කරගනිමින් සිය ක‍්‍රිකට් අනාගතය පිළිබඳ මුළු ලොවටම පැහැදිලි ඉඟියක් ලබාදුන්නේය.


මේ දක්වා ටෙස්ට් තරග 148කට ක‍්‍රීඩා කර ඇති මහේල එහිදී රැස්කර ඇති ලකුණු සංඛ්‍යාව එකොළොස්දහස් හත්සීය පනස් හයකි. ඊට ශතක 34ක් හා අර්ධ ශතක 49ක් ද ඇතුළත්වේ. ඊට ද්විත්ව ශතක 7ක්ද ඇතුළත්වේ. ලොව වැඩිම ටෙස්ට් ලකුණු ලාභීන් අතර මහේල ජයවර්ධන පසුවන්නේ 7වන ස්ථානයේය.

 මහේල රැකගෙන ඇති උඩපන්දු සංඛ්‍යාව 202කි. නායකයෙකු ලෙස ඔහු ශ‍්‍රී ලංකාව වෙනුවෙන් ජයග‍්‍රහණ 13ක් ලබා දී ඇත.


මහේලගේ ක‍්‍රීඩා සමාජයට අයත් ක‍්‍රීඩාංගණය වන එස්.එස්.සී. ක‍්‍රීඩා පිටිය ඔහුගේ සමුගැනීම වෙනුවෙන් විවිධ සැරසිලිවලින් අලංකාර කිරීමට ද පියවර ගෙන තිබේ.


මහේල ජයවර්ධන යනු ශ‍්‍රී ලංකාවෙන් බිහි වූ අග‍්‍රගණ්‍ය ක‍්‍රීඩකයෙකු බව  ශ‍්‍රී ලංකා නායක ඇන්ජලෝ මැතිව්ස් ප‍්‍රකාශ  කරයි. කණ්ඩායම් සාමාජිකයෙකු ලෙස ඔහු නිරන්තරයෙන් දක්වන සහය අති විශිෂ්ට බවද මැතිව්ස් කියා සිටියේය. 


ඔහුට ගෞරවණීය සමුගැනීමක් ලබාදීම සඳහා මෙම තරගය ජයග‍්‍රහණයකින් නිම කිරීම තම බලාපොරොත්තුව බව මැතිව්ස් ඊයේ පැවති මාධ්‍ය හමුවේදී වැඩිදුරටත් කියා සිටියේය. 


මහේලගේ සමුගැනීම වෙනුවෙන් අද ආරම්භ වන ටෙස්ට් තරගය නොමිලේ නැරඹීමට අවස්ථාව ලබදීමට ශ‍්‍රී ලංකා ක‍්‍රිකට් ආයතනය තීරණය කර තිබේ.


ශ‍්‍රී ලංකා කණ්ඩායමේ ක‍්‍රීඩකයින් කිහිපදෙනෙකු ආබාධවලට ලක්ව සිටින අතර, ඒ වෙනුවට නවක ක‍්‍රීඩකයින් කණ්ඩායමට කැඳවා ඇත. ශමින්ද එරංග වෙනුවට කණ්ඩායමට කැඳවා ඇත්තේ නවක ක‍්‍රීඩක ලහිරු ගමගේ ය. දිමුත් කරුණාරත්න ද ශ‍්‍රී ලංකා කණ්ඩායමට කැඳවා තිබේ. 


නවක වේග පන්දු යවන්නෙකු වන බිනුර ප‍්‍රනාන්දු ද කණ්ඩායමට ඇතුළත්වේ. තරග දෙකකින් සමන්විත ශ‍්‍රී ලංකා පාකිස්තාන ටෙස්ට් තරගාවලිය එකට බින්දුවක් ලෙස දැනටමත් පෙරමුණේ පසුවන්නේ ශ‍්‍රී ලංකාවයි.