ශ්‍රී ලංකා පිල සමඟ ඉරිදා අවසන් වූ තරඟයෙන් පසුව සයීඩ් අජ්මාල්ගේ ‘සැක සහිත’ පන්දු යවන ඉරියව්ව පිළිබඳව වාර්තාවක් තරඟ බලධාරීන් විසින් පකිස්තානු පිලේ කළමනාකරුට ලබා දෙනු ලැබ තිබේ.


මේ අනුව ඉදිරි දින විසි එක තුළ දී ඔහුගේ පන්දු යැවීම නිරීක්ෂණයට ලක් කෙරෙන අතර එහි ප්‍රතිඵල නිකුත් කෙරෙන තුරු සයීඩ් අජ්මාල්ට ක්‍රීඩා කිරීමට අවසර තිබේ.


පළමු සැකය


වසර 2009 දී ඔස්ට්‍රේලියාවට එරෙහිව ඩුබායි හිදී පැවති එක් දින තරගයකදී ද තිස් හය හැවිරිදි සයීඩ් අජ්මාල්ගේ පන්දු යවන ඉරියව්ව පිළිබඳව පැමිණිලි කර තිබුණු නමුත් පසුව ඔහු නිදොස් විය.

සයීඩ් අජ්මාල් මේ වන විට ටෙස්ට් තරඟ 34ක්, එක් දින තරඟ 110ක් සහ විස්සයි විස්ස තරඟ 63 ක් ක්‍රීඩා කරමින් කඩුලු 441 ක් දවා ගෙන තිබේ.

අන්තර්ජාතික නීති රීතිවලට අනුව පන්දු යවන හස්තය අංශක 15 කට වඩා වැළමිටින් නැමීම නීති විරෝධී වෙයි.