අග්‍රාමාත්‍යවරයා මේ බව සඳහන් කර ඇත්තේ කුරුණෑගල දිස්ත්‍රික් ලේකම් කාර්යාලයීය ශ්‍රවණාගාරයේ පැවැති හමුවේදීය.
අලුතින් නව රෝහල ඉදිකර අවසන් වන තුරු කුරුණෑගල මහ රෝහලේ පවතින වෛද්‍ය, හෙද හා සෞඛ්‍ය කාර්ය මණ්ඩල හිඟය වහා ම පියවන ලෙස ද අග්‍රාමාත්‍යවරයා මෙහි දී සෞඛ්‍ය ඇමතිනී පවිත්‍රාදේවි වන්නිආරච්චිට උපදෙස් දී තිබේ.. ඒ අනුව මසක කාලයක් තුළ කුරුණෑගල රෝහලේ පවතින වෛද්‍ය, හෙද හා සෞඛ්‍ය කාර්ය මණ්ඩල හිඟය පියවන බව සෞඛ්‍ය ඇමැතිතුමිය පවසා ඇත.
වසරකට රෝගීන් මිලියන 1.2ක් පමණ මෙම රෝහල මගින් ප්‍රතිකාර ලබන අතර 2019 දත්ත අනුව එම වසරේ දී බාහිර රෝගී අංශයෙන් පමණක් ප්‍රතිකාර ලබා ඇති රෝගීන් ගණන හය ලක්ෂ තිස්දහසකි. මාසික නව දරු උපත් 1000ක් පමණ එහි සිදු වේ.
කොළඹ ජාතික රෝහලට හා මහනුවර රෝහලට පමණක් දෙවැනි වන කුරුණෑගල මහ රෝහල මෙරට තෙවැනි විශාලතම රෝහලයි. ඇඳන් 2374 කින් සමන්විත රෝහලේ වසරකට ශල්‍ය කර්ම 18000 කට ආසන්න සංඛ්‍යාවක් සිදු කරයි. ශල්‍යාගාර 06ක් පමණ යොදා ගනිමින් මෙම ඉලක්කය සපුරන බව කුරුණෑගල රෝහලේ වැඩබලන අධ්‍යක්ෂිකා වෛද්‍ය ප්‍රමිතා ශාන්තිලතා එහිදී පවසා තිබේ.
-පංචාලි අබේසේකර
