ඔහුට විරුද්ධව ඇති චෝදනාව වන්නේ අවම වශයෙන් යුදෙව්වන් ලක්ෂ තුනක් මරා දැමීමට සහය වීමයි. ඔස්කාර් ග්රෝනින්ග් නම් මේ පුද්ගලයා නාසි කඳවුරේ පොත් තබන්නෙක් ලෙස සේවය කර තිබේ.
පොත් තබන්නෙක් ලෙස ඔහුට පැවරී ඇති රාජකාරිය වන්නේ වධ කඳවුරේ සිරකරුවන්ගේ රාජසන්තක කර ඇති දේපළ සම්බන්ධයෙන් වාර්තා තබා ගැනීමයි. ඔස්කාර්ගේ නීතිඥයන් ඔහු වධ කඳවුරේ ඝාතන සඳහා ඍජුව සම්බන්ධ නැති බවට කරුණු ඉදිරිපත් කළත් ඔහු කඳවුරේ කටයුතු නිසි පරිදි කරගෙන යාමට සහාය වීමෙන් ඝාතන සඳහා වක්‍රාකාරව සම්බන්ධ වී ඇති බවට චෝදනා එල්ල විය.
නමුත් ඔස්කාර් වැනි වයස්ගත පුද්ගලයෙක් සිරගත කිරීම පිළිබඳ ගැටළුවක් මතුව තිබේ. මෙම නඩු තීන්දුව සම්බන්ධයෙන් අභියාචනයක් ගොනු කිරීමට ඔස්කාර්ගේ නීතිඥයන් බලාපොරොත්තු වන බව පැවසේ.
මෙම නඩු විමසීම උතුරු ජර්මනියේ ලුඑන්බර්ග් නගරයේ පවත්වා ඇති අතර සාක්ෂි දීම සඳහා අවුස්විට්ස් වද කඳවුරේ සිට නිදහස ලබා පැමිණි පුද්ගලයන් කිහිප දෙනෙක් ද පැමිණ තිබේ.
වසර 2005 දී ඔස්කාර් බීබීසී වෙත අවුෂ්විට්ෂ්හි තම කාර්යභාරය සම්බන්ධයෙන් සාකච්ඡා කොට ඇති අතර ඔහු එහිදී පවසා ඇත්තේ තමන් පුද්ගලයන් මරණයට පත්කරන ගෑස් කුටි සහ ආදාහනාගාර දුටු බවයි. එසේම ගෑස් කුටිවලට පුද්ගලයන් ඇතුළු කරන ආකාරය දුටු බවත් එහිදී සඳහන් කර තිබේ.
1940 - 1945 කාලසීමාවේදී යුරෝපීය යුදෙව්වන් මිලියනයකට අධික ප්‍රමාණයක් මෙම අවුස්විට්ස් කඳවුර තුළ ඝාතනය කර ඇති බව වාර්තා වේ.
