මෙම ඝාතනය පිටුපස රුසියන් රජය සිටින බවට එරට විපක්ෂය සහ යුක්‍රේනය චෝදනා කරති.
හිටපු උප අගමැති නෙම්ට්සොව් අනුස්මරණය කරමින් මොස්කව් නගරයේ ඉරිදා දැවැන්ත පා ගමනක් පැවැත්වීමට රුසියන් විපක්ෂය කටයුතු යොදා තිබිණි. සිකුරාදා ඔහු වෙඩි ප්‍රහාරයට ලක්වූ පාලම මත මල් කළඹ තැබීමෙන් සහ ඉටිපහන් දැල්වීමෙන් ආචාර කිරීමට දස දහස් සංඛ්‍යාත පිරිසක් සෙනසුරාදා එක් වී ඇත.
මෙම ඝාතනය සම්බන්ධයෙන් අංශ කිහිපයක් ඔස්සේ විමර්ශනය කරන බව රුසියන් ජාතික විමර්ශන කාර්යාංශය පවසයි. යුදෙව් ජාතිකයෙක් වූ හිටපු උප අගමැති අන්තවාදී ඉස්ලාම් අයි එස් ත්‍රස්තවාදීන් අතින් මිය ගියා ද එසේත් නැත්නම් පුටින්ගේ නමට කැළැල් කිරීමට එරට විරුද්ධ පක්ෂයේ මෙහෙයවීමෙන් මෙම ඝාතනය සිදු කළා ද යන්න පිළිබඳව මෙහිදී විශේෂ අවධානය ෙයාමු කරනු ඇතැයි සඳහන් වේ.
මෙම ඝාතනය සම්බන්ධයෙන් අදහස් පළ කරන රුසියන් විපක්ෂ නායක සර්ජි මිට්‍රොක්හින් පවසන්නේ වෙනත් දේශපාලන මත දරන්නන්ට මෙවැනි අතවරවලට මුහුණ දීමට සිදුවේ නම්, රුසියාවට අනාගතයක් නැති බවයි. මේ අතර රුසියන් ජනාධිපති පුටින් පවසන්නේ මෙය “ප්‍රකෝප කිරීමක්” බවයි. යුක්‍රේනය ද මේ ඝාතනය සම්බන්ධයෙන් රුසියාවට චෝදනා කර ඇත. කෙසේවෙතත් චෝදනා මධ්‍යයේ වුව ද සටන් විරාමයක් ඇති කරගැනීම සම්බන්ධයෙන් රුසියාව දැඩි කාර්යභාරයක් ඉටු කළේය.
මේ අතර, යුක්‍රේනයට ගෑස් සැපයීම නතර කිරීමට රුසියාව අර අදින බවට ද වාර්තා වී තිබිණි. කෙසේවෙතත් පසුගිය දා රුසියන් ජනාධිපති පුටින් පවසා තිබුණේ යුක්‍රේන හමුදාවට එරෙහිව සටන් නොවදින බවයි.
