මෝදි හිතෛෂි කොටස් විසින් ඔහුගේ උපන් බිම වන ගුජරාට ප්‍රාන්තයේ කොතාරියා ගම්මානයේ හින්දු දේවාලයක ඉදිකරන ලද මෝදි ප්‍රතිමාව විවෘත කිරීමට සුදානම් කර තිබුණේ ඉකුත් ඉරිදාය.
එහෙත් ඒ පිළිබඳව අප්‍රසාදය පලකරන මෝදි ඉන් තමා මවිතයට පත් වූ අතර එය ඉන්දිය සම්ප්‍රදායට එරෙහි වන්නක් බවද කියා තිබේ.
මෝදි ලෝලී කණ්ඩායම නමින් යුත් පිරිසක් මෙම ප්‍රතිමාව ඉදිකර ඇති අතර එහි නායක ජයෙෂ් පටල් පවසන්නේ මෝදි ගේ අකමැත්ත නිසා එම ප්‍රතිමාව දේවාලයෙන් ඉවත්කර ඒ වෙනුවට ඉන්දීය මාතාවකගේ පිළිරුවක් එහි ස්ථාපනය කරන බවයි.
දේශපානඥයින් ,සිනමා තාරකාවන් හා ක්‍රිකට් ශූරයන් ආදිය වෙනුවෙන් දේවාලවල පිළිරූ තැනීම ඉන්දියාවේ සාමාන්‍යයෙන් දක්නට ලැබෙන තත්ත්වයක් වන බව ප්‍රකාශිතය. මීට පෙර ඉන්දීය අගමැතිනියක වූ ඉන්දිරා ගාන්ධිගේ හා රාම් රාඕ ගේ ප්‍රතිමා දේවාලවල ඉදිකර ඇති බවත් ඉකුත් ජනවාරියේදී ඉන්දීය කොංග්‍රස් පක්ෂ සභාපතිනි සෝනියා ගාන්ධිගේ ප්‍රතිමාවක් දකුණු ඉන්දියාවේ විවෘත කර ඇති බවත් සඳහන්ව තිබේ.
