එම බලධාරින්ට අනුව මෙම ක්‍රියාවලිය තුළදී එක් අයකු මියගිය බව තවත් දෙදෙනකු තුවාල ලැබූ බවත් සඳහන් කර ඇත. ඔවුන් පවසා ඇති අන්දමට නෞකාව තුළ කළ සෙවීම්වලදී තවත් මළ සිරුරු නවයක් හමුවීම හේතුවෙන් මෙම අනතුරින් මිය ගොස් ඇති ගණන දහය දක්වා ඉහළ ගොස් ඇති බවය. ඉතාලි බලධාරින් මෙසේ ප්‍රකාශ කළ ද කොපමණ පිරිසක් අතුරුදන් වී ඇත්ද යන්න මෙතෙක් අනාවරණය වී නැත.
ඉතාලි ගමනාගමන අමාත්‍ය මවුරිසියෝ ලූපි නිවේදනයක් නිකුත් කරමින් පෙන්වා දී ඇත්තේ නෞකාවේ මගීන් කොපමණ සිටියේද යන්න තහවුරු කර ගැනීමට නොහැකිව ඇත්තේ ගමන් ආරම්භයේ සකස් කර තිබූ මගී ලැයිස්තුවේ තිබි ඇති වැරදි හේතුවෙන් බවය.
ඔහු වැඩිදුරටත් පවසා ඇත්තේ කොපමණ මගී පිරිසක් නෞකාවට ආරම්භයේ දී ගොඩ වී ඇත්ද අතරමගදී කොපමණ පිරිසක් එයින් පිටවී ඇත්ද යන්න සටහන් වී නොමැති බවයි. ඒ හේතුවෙන් එම නෞකාව ඉතාලියට සංක්‍රමණිකයන් පිරිස් රැගෙන ඒමක් සිදු කිරීමට සම්බන්ධ බවට සැකයක්ද මතු වී ඇත.
නෞකාවෙන් මුදවාගත් පිරිස් වැඩි දෙනකු පවසා ඇත්තේ ගින්න ඇතිවීමත් සමග ඉතා කලබලකාරී තත්ත්වයක් ඇති වූ බවත්, ඒ හේතුවෙන් සමහර පිරිස් අතර ගුටිබැට හුවමාරුවක්ද ඇති වූයේ දිවි බේරා ගැනීමට උත්සාහ දැරීමේ හේතුවෙන් බව පැහැදිලි කර තිබේ. ඒ අතර සමහරු කාර්ය මණ්ඩලයට දොස් නගා ඇත්තේ හදිසි අනතුරු හැඟවීම් සිදු කිරීමට ඔවුන් ක්‍රියා නොකළ බව පවසමිනි.
