ඒත් සමහර අය නම් කෙට්ටුවෙන්න කියලා හිතාගෙනත් පලතුරු විතරක්ම කන්නත් උනන්දු වෙනවා. ඒ වුණාට පලතුරු විතරක් කාලා ශරීරය කෙට්ටු කර ගන්න පුළුවන් වෙනවා කියලා හිතුවාට නැති ප්‍රශ්න ගොඩක් බලෙන් ඇගේ දාගන්නවා වගේ වැඩක් ද මේ කරන්නේ කියලා ටිකක් කල්පනා කරලා බලන්න වටිනවා.
ශරීර සෞඛ්‍ය පිළිබඳ හිතලා බලන කොට පලතුරු විතරක් කාලා ඉන්න එක පෝෂණය පිළිබඳ සලකා බැලීමේදී ඒ තරම්ම හොඳ දෙයක් නෙමෙයි.
සාමාන්‍යයෙන් පලතුරුවල විටමින්, ඛනිජ ලවණ වැනි පෝෂණ කොටස් බහුලව අන්තර්ගත වෙලා තිබුණත් එය කිසිසේත්ම සමබල ආහාරවේලක් ලෙස සැලකිය නොහැකියි. ඒ විතරක්ම නෙමෙයි කෙසෙල්, අලිගැටපේර, අඹ වැනි කාබෝහයිඩ්‍රේට් සහ මේදය වැනි පෝෂණ කොටස් මෙන්ම පලතුරුවල අඩංගු සීනි මඟින් ශරීරයට අහිතකර බලපෑම් ද ඇතිවිය හැකියි.
පසුකාලීනව මෙමඟින් රුධිරගත සීනි මට්ටමට ද යම් බලපෑමක් ඇති කරවිය හැකියි. ඒ නිසා ශරීරයේ බර පිළිබඳව සැලකිලිමත් වී ඔබ නිවැරදි, සමබර මෙන්ම පෝෂ්‍යදායී ආහාර රටාවෙන් බැහැර වීමට උත්සාහ දරනවා නම් එය කිසිසේත්ම ඔබගේ ශරීරයට යහපතක් ඇති නොකරාවි.
ඒ වගේම ශරීරයට අවශ්‍ය නිසි ව්‍යායාමය හා සමබල ආහාර වේල් ප්‍රමාණයක් ඔබගේ වයසට සෞඛ්‍යයට අනුව සකසා ගෙන නිරෝගී ජීවිතයක් ගත කරන්නට පුරුදු විය හැකි නම් එය වඩාත් යහපත්.
(arogya)
