පොදු ව්‍යාපාර පිළිබඳ පාර්ලිමේන්තු කාරක සභාව තුළ හටගෙන ඇති මෙම අර්බුදකාරී තත්ත්වය හමුවේ මේ වන විට කණ්‌ඩායම් දෙකක්‌ මත දෙකක සිටින අතර තවත් කණ්‌ඩායමක්‌ මධ්‍යස්‌ථ පිළිවෙතක සිටින බව එම කමිටු සාමාජිකයෙක්‌ කීය.
මෙම තත්ත්වය හමුවේ කෝප් කමිටුවේ කටයුතු ද ඉදිරියට පවත්වාගෙන යෑමට නොහැකි තත්ත්වයක්‌ මතුවී ඇතැයි එම සාමාජිකයා පැවසීය.
මෙම කමිටුව පාර්ලිමේන්තු මන්ත්‍රීවරුන් 26 දෙනකුගෙන් සමන්විත වන අතර එහි සභාපති ධුරය ජවිපෙ මන්ත්‍රී සුනිල් හඳුන්නෙත්ති මහතා විසින් දරනු ලබයි. ආණ්‌ඩු පක්‍ෂයෙන් මන්ත්‍රීවරු 12 ක්‌, ජවිපෙන්, දෙමළ ජාතික සන්ධානය සහ මහින්දවාදී විපක්‍ෂය නියෝජනය කරමින් මන්ත්‍රීවරු 10 දෙනෙක් හා ශ්‍රීලනිප ඇමැතිවරු 04 දෙනෙක් කමිටුව නියෝජනය කරති.
අර්ජුන මහේන්ද්‍රන් මහතාගේ සිද්ධිය සම්බන්ධව ශ්‍රීලනිප සහ දෙමළ ජාතික සන්ධාන මන්ත්‍රීවරු අවසන් නිගමනයකට එළැඹ නොමැති අතර ඔවුන් මධ්‍යස්‌ථ පිළිවෙතක්‌ අනුගමනය කරන බව ද ඉහත සාමාජික මන්ත්‍රීවරයා කීය.
ඒ අනුව ආණ්‌ඩුව නියෝජනය කරනු ලබන මන්ත්‍රීවරුන් එක්‌ පාර්ශ්වයක්‌ ද ජවිපෙ සහ මහින්දවාදී විපක්‍ෂය විරුද්ධ මතධාරී පාර්ශ්වයක්‌ ලෙස ද ක්‍රියා කරන බැවින් මෙම අර්බුදය ඇති වී තිබෙන බව හෙතෙම වැඩිදුරටත් පැවසීය.
මේ අතර ශ්‍රී ලංකා මහ බැංකුවේ බැඳුම්කර සිද්ධිය සම්බන්ධයෙන් කරුණු විමසීම සඳහා විගණකාධිපති ගාමිණී විඡේසිංහ මහතා අද (29 වැනිදා) පාර්ලිමේන්තු පොදු ව්‍යාපාර පිළිබඳ කාරක සභාවට (කෝප් කමිටුව) කැඳවා ඇත.
- දිවයින ඇසුරෙණි
