පසුගිය සතියේ ඔහුගේ දෙවැනි පුත් යෝශිත රාජපක්ෂ CSN නාලිකාවේ අයථා ගණුදෙනු කිරීම් සම්බන්ධයෙන් ප්‍රශ්න කරනු ලැබ අත් අඩංගුවට ගැණුනු අතර අද (01) ඔහුගේ බිරිඳ නැවතත් බරපතළ වංචා විමර්ශන ජනාධිපති කොමිසම හමුවට හමුවට කැඳවා ඇත. ඒ ඇයගේ ලේකම් වරයකුට අඩු තක්සේරුවක් යටතේ නිවසක් ලබා දීමට ජාතික නිවාස අධිකාරියට 'නියෝග' කිරීම පිළිබඳව ප්‍රශ්න කිරීමට ය.
"මෙන්න පලිගන්නවෝ" කියමින් සිය පතිභාපූර්ණ රංගන හැකියාව හරහා දැනට අවලංගු කාසියක් වෙමින් යන සිය ප්‍රතිරූපයේ වටිනාකම නැවත ඉහළ දමා ගැනීමට මහින්ද රාජපක්ෂ මහතාට හැකිවනු ඇති අතර ඔහුගේ කඳුළු වලට සැබෑ වටිනාකමක් ඇත්නම් ඇති එකම තැන වනු ඇත්තේ දැනට බලයේ ඉන්නා උදවිය අනාගතයේ තමුන්ට මෙසේ නොවන්නට බලය අයථා පරිහරණයෙන් වැළකී සිටින්නට ඉගෙන ගන්නවා නම් පමණි.
පුවත පහතින්
හිටපු ජනපති ආර්යා ශිරන්ති රාජපක්ෂ මහත්මිය අද(01) දිනයේ බරපතළ වංචා විමර්ශන ජනාධිපති කොමිසම වෙත කැඳවා තිබේ.
ශිරන්ති රාජපක්ෂ මහත්මියගේ මාධ්‍ය සම්බන්ධීකාරවරයෙකු ලෙස කටයුතු කළ පුද්ගලයෙකුට අඩු තක්සේරුවක් යටතේ නිවසක් ලබාදීම සම්බන්ධයෙන් ප්‍රකාශයක් ලබාදීම සඳහා ඇය ජනාධිපති කොමිසම වෙත කැඳවා ඇති බව සඳහන්ය.
එම නිවස අදාළ මාධ්‍ය සම්බන්ධීකාරවරයාට ලබා දෙන ලෙස ශිරන්ති රාජපක්ෂ මහත්මිය ජාතික නිවාස සංවර්ධන අධිකාරියට නියෝගයක් ද සිදු කර තිබේ.
එම නිවස රුපියල් ලක්ෂ 05ක වටිනාකමක් පෙන්වා මාධ්‍ය සම්බන්ධීකාරවරයාට ලබාදී ඇති බව කියැවෙන අතර එම නිවසේ සැබෑ වටිනාකම රුපියල් ලක්ෂ 55ක් වන බව බරපතළ වංචා විමර්ශන ජනාධිපති කොමිසමේ ලේකම් ලැසිල් ද සිල්වා මහතා සඳහන් කළේය.
මේ අතර මෙම සිද්ධියට අදාළව ප්‍රකාශයක් ලබාගැනීම සඳහා ශිරන්ති රාජපක්ෂ මහත්මියට පසුගිය සදුදා දිනයේ ද කොමිසම වෙත පැමිණෙන ලෙස දැනුම්දීමක් සිදු කර තිබුණි.
